Dili, 18 Fevereiru 2025 (Média Democracia) – Governu liuhusi Sekretaria Estadu ba Formasaun Profisionál no Empregu ( SEFOPE), hala’o sorumutuk ho Delegasaun Nova Zelandia hodi deskuti kona-ba Mobilidade laborál ba Nova Zelandia.
Embaixadora Nova Zelandia iha Timor-Leste Hellen Tunnah hateten, nu’udar reprezentante governu Nova Zelandia nian iha Timor-Leste kontente tebes iha prezensa espesiál nasaun ne’e hodi aumenta programa mobilidade laborál iha Timor-Leste.
“Objetivu husi hasoru malu ida ne’e mak atu hahú diskusaun inísiu ho SEFOPE kona-ba sistema mobilidade laborál nomos iha akordu ruma, eskema Nova Zelándia aplikasi ba seitór rua, hortikultura no agrikultura.” Dehan Embaixadora Nova Zelándia ba jornalista sira iha Edifísiu SEFOPE Caicoli tersa ne’e
Nia dehan Diskusaun semana ne’e sei haree liu sistema sira iha nasaun ida-idak nian no informasaun ne’ebé fahe sei ajuda Timor-Leste atu tama iha eskema Nova Zelandia nian.
“Ha’u hatene katak imi sei husu perguntas no ha’u bele dehan ami la iha oráriu fiksu ba programa ne’e atu hahú bainhira no laiha númeru traballadór fiksu ne’ebé atu ba servisu, maibé ami espera katak ami sei halo progresu di’ak iha ami-nia esforsu, nune’e ami bele aktualiza informasaun ba ema hotu-hotu.” Dehan nia
Ita hotu hakarak harii planu ba eskema ida ne’e atu halo loloos, maibé importante mós atu uza tempu hodi asegura katak dezeñu planu ida ne’ebé di’ak no sei susesu liu, bainhira prontu hotu ona programa ne’e sei ajuda liu dezenvolvimentu Timor-Leste.
Iha biban ne’e Sekretáriu Estadu Formasaun Profeisional no Empregu Rogério Araújo Mendonça hatutan, relasiona ho públiku nia kestiona kona-ba informasaun ne’ebé iha tinan 2024 liubá, nune’e Nova Zelandia ho SEFOPE sei esforsu hodi estabelese programa mobilidade Laborál. Nune’e ohin Embaixadora Nova Zelándia halo sorumutuk ho SEFOPE hodi deskuti kona-ba asuntu refere.
“Sorumutuk ba ohin loron ne’e importante tebes liliu ita atu tama ona ba iha faze ne’ebé di’ak, nune’e ita haree katak faze ne’e bele hola parte ona no governu bele kontinia asina MOU kalae. Tanba ne’e mak orsida sei halo deskuti durante loron tomak, hafoin bele fó rezultadu, ha’u hanoin iha sexta antes ne’e ekipa delegasaun sira fila husi Timor atu ba iha Nova Zelándia, ha’u hanoin ita-boot sira bele hatene katak prosesu ne’e oinsá, kontinua ka sei dada tan tempu ba para hodi halo diskusaun.” Dehan Sekretáriu Estadu Rogério Mendonça depois de sorumutuk iha sala enkontru
Governante ne’e afirma katak SEFOPE seidauk iha akordu, maibé foin ba iha diskusaun ho governu Nova Zelandia no embaixadora, nune’e bele akompaña prosesu refere.
“Ita sei ko’alia hamutuk, ita sei haree parte governu Nova Zelándia mós sei haree fila-fali MOU ne’ebé parte Governu Timor-Leste liuhusi Sekretáriu Estadu Formasaun Profesionál hala’o ona ho Austrália, Korea Súl no Japaun, ida ne’e sira sei haree fila fali, entaun sira mós sei hatama fila fali programa sira ne’ebé sira nia nasaun iha, ha’u hanoin ida ne’e mós ita sei hamosu hela ita-nia diskusaun hodi prepara ba MOU.” Nia afirma
Sekretáriu Estadu Rogério fiar katak ho prezensa husi Embaixadora Nova Zelándia mai iha Timor-Leste nomos Embaixadora Timor-Leste ba iha Nova Zelándia bele estabele kooperasaun.
“Ekipa ne’e la’os mai husi kompañia balu, ne’e ekipa ne’ebé governu nian entaun estandar ne’ebé governu Australia iha, ida ne’e mós estandar Nova Zelandia iha, ne’eduni ha’u garante katak sei Asina MOU ida ne’e iha tinan 2025, ne’e hanesan esperansa boot tebes mai ita Timor-Leste.” Dehan Sekretáriu Estadu Formasaun Profeisional no Empregu Rogério Araújo Mendonça
Sekretáriu Estadu Formasaun Profisional no Empregu (SEFOPE) husu ba joven sira buka aprende liangua sira liuhusi tuir kursu iha sentru formasaun sira ne’ebé iha Munisípiu ka nasionál, nune’e bele envolve-an, liuliu formasaun ba iha área ida ne’ebé merkadu presiza atu servisu ba. Nia mós garante katak depois de sorumutuk ida ne’e ita sei avansa ba iha Asina Nota entendimentu ka MOU.
Reportajen : Estefania
Foto : Estefania