Dili, 19 Novembru 2025 (Média Democracia) – Governu liuhusi Sekretariu Estadu Formasaun Profisionál no Empregu (SEFOPE), deklara iha tempu badak nia laran sei haruka traballador na’in 11 sai nu’udar pilotu dahuluk nian sei ba servisu iha Nova-Zelandia.
Sekretariu Estadu Formasaun Profisionál no Empregu (SEFOPE), Rogério Araújo Mendonça hateten, parte Sekretariu Estadu Formasaun Profisionál no Empregu SEFOPE durante ne’e halo eskrining kona-ba selesaun tuir transparansia katak selesaun ne’e garante duni kualidade hodi hatama ba merkadu.
“Bainhita ita halo rekrutamentu ida ne’e foti haree kor hanesan familia, partidiaria, kolega, ha’u hanoin empregador sira iha futuru sira sei la hili ita-nia traballador foun sira hodi ba servisu iha sira-nia rai.” Dehan Sekretariu Estadu Formasaun Profisionál no Empregu (SEFOPE), Rogério Araújo Mendonça
Sekretariu Estadu Formasaun Profisionál no Empregu hatutan, maske traballador sira ba servisu iha Nova-Zelandia ho numeru ne’ebé ki’ik maibé nafatin koko esforsu nune’e iha futuru sei hetan numeru ne’ebé boot hanesan mós Australia, tanba uluk traballador ba ho numeru ki’ik maibé daudaun ne’e ba ho numeru boot.
“Haree uluk ita haruka traballador sira servisu iha Australia ho numeru ne’ebé ki’ik maibé daudaun ne’e traballador ne’ebé servisu iha Australia hamutuk 21 mill resin ona. Maibé daudaun ne’e ekipa migrasaun Nova-Zelandia nian sei trata hela dokumentus ba traballador sira ne’ebé atu ba servisu iha Nova-Zelandia.” Dehan Sekretariu Estadu Formasaun Profisionál no Empregu (SEFOPE)
Sekretariu Estadu afirma, daudaun ne’e empregador sira halo ona teste entrevista ba traballador na’in 11 sai hanesan pilotu dahuluk ne’ebé prepara atu ba servisu iha Nova-Zelandia iha tempu badak nia laran, nune’e iha tinan oin sei haruka ho numeru ne’ebé boot liu, importante pilotu primeru tenke garante kualiidade no kapasidade, nune’e empregador nafatin tau fiar hodi rekruta fila-fali traballador ho numeru ne’ebé boot.
Esplika liután Sekretariu Estadu Formasaun Profisionál no Empregu (SEFOPE) relata iha tempu badak nia laran sei haruka traballador Timor-ona na’in 11 sai pilotu primeru sei ba servisu iha Nova-Zelandia. Nune’e husu ba traballador hotu ne’ebé hakarak atu ba servisu iha Nova-Zelandia tenke preparan-aan tanba iha tinan oin sei haruka tan ba servisu ho numeru traballador ne’ebé boot.
Reportajen : Nelfiano
Foto : Nelfiano