Dili, 14 Outobru 2024 (Média Democracia) – Sekretáriu Estadu ba Igualidade servisu hamutuk ho UN-Women no liña Ministerias, realiza Workshop kona-ba Plano Asaun Nasionál Violénsia Bazeia ba Jéneru durante implementasaun no monitorizasaun tinan 2022 to’o 2032.
Diretór Jerál Sekretáriu Estadu ba Igualidade Armando da Costa hateten, SEI hamutuk ho UN-Women no parseiru sira ne’ebé hola parte iha planu asaun nasionál Violénsia Bazeia ba Jéneru hamutuk iha atividade ne’e hodi haree implementasaun no monitorizasaun servisu tinan 2022 to’o 2032.
“Ohin SEI hamutuk ho UN-Women no parseiru sira hotu iha Ministériu no Sosiedade Sivil ne’ebé hola parte iha implementasaun Plano Asaun Nasionál Violénsia Bazeia ba Jéneru, organiza sesaun ida ne’ebé espesifikamente foku liubá dezevolvimentu indikadór sira ba iha monitorizasaun implementasaun Plano Asaun Nasionál Violénsia Bazeia ba Jéneru, iha tinan 2022 ba too iha 2032.” Dehan Diretór Jerál SEI Armando da Costa, iha Suai room, Timor Plaza, Segunda ne’e.
Nia afirma plano Asaun Nasionál ne’e sei implementa to’o tinan 2032, dadaun ne’e foin tama tinan rua nune’e SEI hetan tan apoiu husi UN-Women hodi realza monitorizasaun ne’e.
Diretór ne’e hatutan liután katak programa ne’e dadaun la’o hela, iha semana kotuk liubá Konsellu Ministru aprova ona komisaun entre Ministériu ida oinsá atu halo monitorizasaun no avaliasaun ba planu ne’e rasik.
“Agora dadaun la’o hela maka iha semana hirak liubá liuhusi konsellu Ministru konsege aprova ona komisaun entreministéiru ida ba iha monitorizasaun no avaliasaun implementasaun plano ne’e rasik.” Nia hatutan
Enkuantu ba progresu no monitorizasaun servisu ne’e sei relata iha fulan ikus husi tinan ne’e, nune’e liuhusi Workshop refere ekipa traballu prepara hodi identifika molok atu relata nian progresu ho klaru.
Iha fatin hanesan Jestór programa Hamutuk ba Igualidade UN-Women iha Timor-Leste, Nuntana Tangwinit hateten, UN-Women sente kontenti tebes bele apoiu ona inisiativa husi Sekretáriu Estadu ba Igualidade ne’ebé realiza workshop kona-ba progresu no monitorizasaun ba plano Asaun Nasionál VBJ.
“Ami kontente tebes atu fó apoiu ho inisiativa ida-ne’e atu hasa’e progresu monitorizasaun no monitorizasaun hasoru implementasaun Plano Asaun Nasionál no oinsá atu haforsa planu violénsia ne’ebé di’ak liu.” hatete Nuntana Tangwini.
Nia dehan UN Women nia esperansa katak iha faze pilotu ne’e servisu kontinua atu bele hetan dadus, nune’e bele relata progresu programa sira ne’e hotu.
“Ami hahú husi kiik, maibé ami espera katak faze pilotu ne’ebé ami servisu hela nafatin kontinua, ha’u haree no ajuda susesu kona-ba monitorizasaun ida-ne’e, oinsá bele relata programa no progresu hotu, nune’e bele hetan dadus ne’ebé klaru hodi informa ba polítika nain sira.” Nia dehan.
Nuntana haktuir Sorumutu ida-ne’e, UN-Women haree atu hakle’an liután kona-ba instrumentu sira ne’ebé uza ba Kolesaun dadus.
“Depois ne’e, ami hein katak modelu pilotu ne’e iha xave balun, Indikadór sira sei ajuda informasaun ba ita-boot sira-nia prosesu no habelar kontinuasaun hodi halo monitorizasaun ba progresu ne’ebé ema hotu-hotu servisu hela iha futuru.” Nia haktuir
Entretantu iha atividade ne’e hetan partisipasaun husi Liña Ministerial sira, Sosiedade Sivil nomos Parseiru servisu hotu.
Reportajen : Estefania
Foto : Estefania