Dili, 20 Maiu 2025 (Média Democracia) – Sekretariu Estadu Komunikasaun Sosiál (SEKOMS) Expedito Loro Dias Ximenes hamutuk ho Embaixadora Portugal iha Dili Maria Fernandes Manuela Bairos fahe sertifikadu ba formadu na’in haatnulu resin sia (49) ne’ebé durante tinan ida konklui ona formasaun iha sentru lian ba jornalista (CLJ, sigla portugés), Atividades atribui sertifikadu ne’e realiza iha segunda feira semana ne’e.
Nia dehan Nonu Governu Konstitusionál durante servisu hamutuk ho Institutu Camoes fó formasaun ba kolega sira oinsá atu bele ko’alia no hakerek ba iha orgaun komunikasaun sosiál sira.
“Ohin ha’u mai asiste hamutuk ho Embaixadora Portugal iha ne’e atu entrega sertifikadu ba sira ne’ebé iha nivel oin-oin. No projeitu tuir mai ami sei asina iha terseira, mesmu ami hein ba terseira faze agora dadaun Governu Consultorio Língua para Jornalista (CLJ) oras ne’e ita destaka ona revizores Timor-oan iha Diligente iha GMN iha RTTL no iha Tatoli.” Dehan Sekretariu Estadu Komunikasaun Sosiál (SEKOMS) Expedito Loro Dias Ximenes
Expedito hateten, iha terseira faze sei haree liubá jornalista ne’ebé audivizual nomos imprensa ba sira ne’ebé hanesan online, ho nune’e Embaixadora portugal aseita ona akordu ba formasaun ne’e, terseira faze sei halo iha tempu badak, tanba foin dadaun ne’e Governu Timor -Leste no Governu Portugal Programa Espesial iha Komunikasaun Sosiál nian (PEC).
“Ohin molok ha’u mai entrega sertifikadu ne’e ha’u hasoru malu ho Embaixadora no ami ko’alia kona-ba oinsá iha prinsipiu jerais atu deside iha terseira faze ne’e atu koalia kona-ba saida, nune desidi terseira faze ita sei aposta makas ba iha jornalista sira ne’ebé atu hakerek lian Portuges.” Nia afirma
Iha biban ne’e, Governante ne’e mós hateten, tinan ne’e SEKOMS planea atu haruka jonalista nain haat ba kontinua formasaun iha Centro Protocolar de Formação Profissional para Jornalistas (CENJOR).
Iha fatin hanesan, Embaixadora Portugal iha Dili Maria Fernandes Manuela Bairos agradese ba Sekretariadu Estadu Komunikasaun Sosiál no ba formadu no formadór sira ne’ebé prezente iha projetu Konsultoriu lian ba jornalista ne’e, tinan oin kompleta ona tinan sanulu kooperasaun Governu Timor-Leste ho instituisaun Camoes hodi fó formasaun ba jornalista sira no funsionariu husi instituisaun oin oin.
Formada Yane Alfrida Domingas Maia hateten, nia parte konklui ona kursu Portugés iha Sentru Língua ba jornalista (CLJ, sigla Portugés) husi A1, A2, B1, B2, B2± inklui saude edukasaun no ambiente, nune’e mós iha area ekonómia formasaun sira ne’e lori tempu naruk hodi konklui.
“Agora ha’u hetan oportunidade hanesan revizora ida ne’e lori ha’u tenke estuda no aprende vokabulariu. Nune’e bele halo halo revizasaun ba notisia ho kualidade iha ha’u nia nia servisu. Formasaun ne’e hanorin ita oinsá kontinua respeita ba Kódigu etika jornalistiku no respeita gramatika tanba jornalista la’ós atu informa maibé atu mós eduka.” Nia haktuir
Nia dehan importánsia husi formasaun ne’e mak aumenta kapasidade jornalista atu jornalista sira bele hakerek ho di’ak no iha hanoin kritika atu analize dokumentu ne’ebé iha, tanba Portugés ne’e fundamenta tebes no Timor-Leste ne’e lian ofisiál mak lian Portuges, maioria dokumentu ne’e Portugés tanba ne’e ejize jornalista atu hatene Portugés, nune’e ho koñesimetu ne’ebé iha bele analize dokumentu sira hodi transforma ba notisia.
“Hanesan formadu no revizora ha’u sei utiliza ha’u nia koñesimentu ne’e iha servisu fatin nune’e hafoin halo publikasaun. Ha’u husu para formasaun sira hanesan ne’e bele Governu kontinua, nune’e bele kapasita maluk jornalista Timor-oan hotu bele harekrek no halo analize ba dokumentu ho di’ak.” Nia konklui
Nune’e mós formanda Domingas da Silva Gonçalves, sente kontente tebes tebes tuir formasaun iha Sentru Língua ba Jornalista tanba Portugés ne’e nu’udar língua lian ofisiál.
“Ha’u hanesan jornalista iha Média Democracia sente kontente, maske iha dezafiu iha formasaun maibé ne’e laos impende espiritu atu aprende.” Nia haktuir
Nia husu SEKOMS no CLJ atu kontinua formasaun ida ne’e tanba jornalista barak sei presiza hasai sira nia koñesimentu iha area língua nian.
Reportajen : Domingas
Foto : Domingas