Dili, 07 Agostu 2025 (Média Democracia) – Governu liuhusi Sekretariu Estadu Komunikasaun Sosiál (SEKOMS) hamutuk ho Konsellu Imprensa realiza sorumutu hodi diskute kona-ba substansial lei komunikasaun sosial ba jornalista hotu iha Timor-Leste.
Sektetariu Estadu Komunikasaun Sosiál SEKOMS, Espedito Loro Dias Ximenes hateten, hotu-hotu akompaña ona esplikasaun iha semana kotuk liuba nian, nune’e ohin XI Governu liuhusi Sektetariu Estadu Komunikasaun Sosiál SEKOMS halo enkontru preliminar diskusaun kona-ba revizaun lei komunikasaun sosial.
“Ohin iha diskusaun dahuluk ami mós konkorda malu katak presiza atu hakle’an liutan kona-ba revizaun ne’e iha nia estrutura legislasaun nian, ami konkorda katak iha tempu semana oin iha loron 14 Fulan Agostu mak ami sei diskute kona-ba artigu per artigu sira ne’ebé serve duni atu halo revizaun fila-fali.” Tenik Sekretáriu Estadu Komunikasaun Sosiál SEKOMS, Espedito Loro Dias Ximenes
Sekretáriu hatutan, tanba lei komunikasaun sosial uluk iha distintus Deputadus sira Legislatura iha sestu Governu halo iha 2014 tinan 11 ona avansu teknolojia ho preokupasaun husi publiku kona-ba lei Komunikasaun Sosial nia papel iha prosesu dezenvolvementu prosesu konstrusaun Estadu no nasaun presiza duni atu halo revizaun.
“Ohin ami mós halo diskusaun preliminar de’it kolia kona-ba priamblu nian ami diskute seidauk tama iha substansia revizaun nian, entaun semana oin mak ami sei diskute kle’an kona-ba revizaun lei komunikasaun sosial nian. Importante mak governu liuhusi SEKOMS no Konsellu Imprensa konkorda katak presiza duni atu revizaun ba lei komunikasaun sosial nian.” Hatutan SEKOMS
Nia afirma, tanba ne’e ami hotu konkorda malu katak presiza duni ona atu halo revizaun ba lei komunikasaun sosial ne’ebé ami mós koalia preliminar kona-ba prinsipiu jerais atu oinsa bele halo revizaun refere, nune’e semana oin sei koalia kona-ba substansia.
Iha sorin seluk Prezidente Konsellu Imprensa (KI) Cesar Monis Mali hateten, liga ho revizaun ba lei komunikasaun sosial iha semana kotuk ami mai hakarak atinji objetivu ida ne’ebé komun ba interese ema hotu nian hodi asegura jornalizmu iha Timor-Leste bele lao ho di’ak tuir duni lei komunikasaun sosial.
“Ita mós nafatin halo diskusaun labele para iha ne’e de’it maibé nafatin halo diskusaun lao buat hotu-hotu ne’ebé ita hakarak. Tanba diskusaun ne’e importante tebes nune’e tenke halo diskusaun dala haat ba leten to’o hetan solusaun iha futuru. Ami ohin diskute foka liubá pontus balun ne’ebé presiza halo tan ajustamentu, nune’e enkontru tuir ami bele intende malu di’ak liután iha futuru.” Dehan Prezidente Konsellu Imprensa (KI) Cesar Monis Mali
Nia hatutan, ohin realiza sorumutu ne’e hamutuk ho SEKOMS sei halo diskusaun kle’an liután iha loron 14 Fulan Agostu semana oin. Entaun diskusaun ne’e sei tama iha nivel foun ida sei koalia kona-ba substansial alterasaun lei komunikasaun sosial.
Esplika liutan lei Komunikasaun Sosial ne’e importante tebes, maibé ita labele halo urjentimente tanba ida ne’e atu regula ba ema hotu-hotu, entaun tenke kuidadu ho di’ak hodi nune’e diskusaun sei hadia ba semana oin hodi diskute kona-ba substansial lei Komunikasaun Sosial nian ba Jornalizmu hotu iha Timor-Leste.
Reportajen : Nelfiano
Foto : Nelfiano