Dili, 27 Marsu 2025 (Média Democracia) – Sekretáriu Estadu Kooperativa (Secoop-sigla Portugues), Hamutuk ho lider komunitária Talitu, MOKATIL nomós produtór sira kolleta Bafo Kayrala hektare ida iha Talitu, Postu-Administrativu Laulara, Munisípiu Aileu iha kuarta ne’e.
Hafoin halo abertura ba formasaun ponto fokal finansas iha Salaun Esperensa Delta, Sua Eselénsia Sekretáriu Estadu Kooperativa desloka kedas ba Munisípiu Aileu, Postu-Administrativu Laulara hodi kolleta Bafo Kayrala hektar ida iha aldeia Kasmantutu, Suku Talitu iha époka dahuluk nian hamutuk ho xefe Autoridade Lokál, Prezidente Movimentu Komponeza Timor-Leste nomos produtór sira.
Sekretáriu Estadu Kooperativa (SECOOP) Arsénio Pereira da Silva, partisipa iha atividade kolleta Bafo Kayrala hektare ida, iha biban ne’e Eselénsia Sekretariu Estadu agradese ba produtór sira tanba bele servisu hamutuk ho funsionáriu SECOOP ne’ebé destaka iha Munisípiu Aileu.
“Agradese ba produtór sira tanba bele servisu hamutuk ho funsionáriu SECOOP nian ne’ebé destaka iha Munisípiu Aileu no Prezidente MOKATIL Munisípiu Aileu nian hodi kultiva produtu Bafo Kayrala iha sira nian to’os to’o koilleta hatudu rejultadu di’ak.” Dehan Sekretáriu Estadu Kooperativa ne’ebé Media Democracia asesu liuhusi pájina ofisiál SECOOP nian iha loron (26/03/2025)
Iha biban ne’e Eselénsia Sekretáriu Estadu husu ba produtór sira atu nafatin kontinua prodúz produtu ne’ebé fó rendimentu ba sira.
“Nafatin husu ba produtor sira atu kontinua produz produtu saida deit importante maka bele fó rendimentu ba sira loron-loron hodi kontribui ba hasa’e krésimentu ekonomia famíliar nian.” Dehan nia
Antes taka Governante ne’e orienta funsionáriu sira husi Sekretáriu Estadu Kooperativa ne’ebé destaka iha Munisípiu Aileu atu tun ba área rural sira hodi identifika produtu sira ne’ebé kamponezes sira prodúz hodi bele hatene ninia dadus ho lolos no bele oferese ba merenda eskolar no lori merkadu sira seluk.
Iha fatin hanesan Xefe Suku Talitu, Abril Barreto hatutan katak prezensa Sua Eselénsia Sekretáriu Estadu Kooperativas nian ne’e hanesan grasa bo’ot ida ba iha ninia Suku, liu-liu iha Aldeia Kasmantutu.
“La espera katak membru Governu ida bele vizita iha área ne’ebé rural no remotas liu, rekomenda ba Sua Eselénsia SEKOOP atu habelar programa Kuda Bafo Kayrala ba iha aldeia sira seluk no husu atu tatoli hela sira halerik kona-ba estrada iha aldeia sira kuaza aat total hodi difikulta sira lori produtu ba merkadu.” Dehan Xefe Suku Talitu
Enkuantu tuir dadus ne’ebé relata husi MOKATIL Munisípiu Aileu nian katak, ba epoka dahuluk tinan 2025 nian total rai hamutuk hektares 12 resin maka kultiva Bafo Kayrala no balun koilleta ona ninia rejultadu sai hanesan fini hodi distribui ba Munisípiu sira seluk ne’ebé menus fini Bafo, atu nune’e bele kultiva fali iha epoka sira tuir mai.
Reportajen : Estefania
Foto : Estefania