Dili, 02 Outubru 2025 (Média Democracia) – Liuhusi komunikadu imprensa ne’e Sekretariadu Rekrutamentu ba Kadetes Polisia Nasional Timor-Leste tinan 2025 fó sai selesaun dokumentu ba kadetes ne’ebé pasa iha selesaun dokumentu no kadetes ne’ebé la pasa iha selesaun dokumentu, inklui mós fó sai loron ba prova kultura ba kadetes sira kada munisipiu.
Porta-Voz Komisaun Rekrutamentu Kadetes foun 2025 Komandante Antonio da Luz hateten, ohin loron liuhusi Sekretariadu rekrutamentu PNTL nian fó sai ba publiku rezultadu verifikasaun dokumentus ne’ebé kandidatu munisipiu sira submete mai.
“Lista ne’ebé hatama mai Sekretariadu hamutuk 13.770 ne’ebé kompostu husi mane 10.255 no feto 3.515 husi total kandidatu sira ne’ebé ohin submete ona sira nia dokumentu ne’e Sekretariadu Rekrutamentu halo verifikasaun no ikus mai hetan kandidatu sira ne’ebé admitidu hamutuk 12.851, kompostu husi mane 5.529 no feto 3.322, ba kadetes ne’ebé la admitidu ka la pasa iha selesaun dokumentu kompostu husi mane 726 no feto 193, hamutuk 119.” Dehan Porta-Voz Komisaun Rekrutamentu Kadetes foun 2025 Komandante Antonio da Luz
Porta-voz informa ba publiku katak tuir lolos ezame ba kadetes foun sira realiza iha loron 5 fulan outubru tinan 2025 maibé, tanba prosesu verifikasaun ba dokumentus ne’e presiza tempu hodi haree didi’ak, entaun iha fulan jullu konkursu deside katak ezame ba kadetes foun sira sei realiza fali iha loron 12 fulan outubru tinan 2025.
“Orariu ba ezame nian hanesan tuir mai 7:00 oras ate 8:00 kandidatu sira iha ona fatin atu tuir ezame nian, 8:00 ate 8:45 kandidatu sira sei simu instrusaun husi pontu fokal sira kada munisipiu kona-ba preparasaun ba ezame nian 8:45 ate 9:45 kandidatu sira tama ona ba aula ida-idak hodi prepara-an ba tuir ezame, 9:45 ate 9:55 ekipa vizitante sira distribui ona materia ezame ba iha kandidatu sira, ezame hahu iha oras 10:00 remata iha oras 12:30 ba kandidatu sira.” Informa Porta-Voz Komisaun Rekrutamentu Kadetes foun 2025 Komandante Antonio da Luz
Porta-voz salient, tuir mai fatin ne’ebé kandidatu sira atu ba tuir ezame iha ida-idak nia munisipiu no fatin eskola sira, husi Munisipiu Aileu fatin ezame nian iha eskola Tekniku Vocasional Aileu Villa ho ESCAM Aileu, iha Minisipiu Ainaro fatin ezame nian iha eskola Ensino Basico Benansiu Fras Ainaro, Atauro fatin ezame iha Eskola Sekundario jeral 99 Atauro, Baucau fatin ezame iha Ensinu Sekundariu jeral Nu.2 Villa Nova Baucau, Bobonaru fatin ezame iha Ensinu Sekundario Jeral Dom-Martinho da Costa Lopes Maliana, Covalima fatin ezame iha Ensinu jeral Seran-Kotek Suai, Munisipiu Dili Fahe ba fatin ezame maka sentru formasaun da polisia nian no ida iha Eskola Baziku Sentral 30 de agostu Comoro ho eskola 5 comoro ba kadetes sira ne’ebé rejistu iha sentru formasaun polisia akdamika, iha fatin segundu mak Dili Munisipiu sei hala’o ezame iha ESTV Becora, no ESTV 28 Novembro Becora, Munisipiu Ermera Eskola Jeral Nino Conis Santana no Eskola Sekundariu 10 de Abril Ermera, Munisipiu Lautem fatin ezame iha Ensino Jeral Nino Conis Santana Lautem, Liquisa fatin ezame iha Ensino Baziku Nu.1 Liquisa, Manatutu fatin ezame Ensinu Sekundariu Jeral Kayrala ho Eskola publiku Biadi, Manufahi fatin ezame iha Ensinu Sekundariu jeral 1912 manufahi, Oecussi fatin ezame iha EBC+EBF 1 de Maio Palaban, Viqueque Eskola sekundariu jeral 4 de setembru viqueque no ensino baziku 01 Beloi.
Porta-voz afirma, Dokumentu no material sira ne’ebé kandidatu sira prepara no lori bainhira atu ezame hanesan kartaun Eleitor original, BI original, se Kartaun Bilite de identidade BI blanco sei la iha bele lori ida provisoriu ne’e, tanba hetan autorizasaun husi STAE, kandidatu sira tenke lori lapis 2B, Apagador, Afiador no Regua sirkulu ikus liu mak kaneta/lapizeira kor azul.
“Husu ba kandidatu sira hahu aban loron 3 fulan outubru 2025 ita-boot sira bele fila ona ba idak-idak nian munisipiu ba iha komando munisipiu hodi haree lista naran sira ne’ebé admitidu ka la admitidu. Ba kandidatu sira ne’ebé iha munisipiu Dili bele mai cek naran iha akademiku, ba kandidatu sira ne’ebé naran admitidu prepara-an atu bele tuir ezame iha loron 12 fulan outubru tinan 2025, komisaun mós sei fó oportunidade ba kandidatu sira ne’ebé la admitidu atu bele halo rekursu, sei fó loron lima ba ita-boot sira atu halo rekursu bele ba hatama fila-fali dokumentu iha ida-idak ninian munisipiu ka bele mai iha Sekretariadu.” Afima Porta-Voz Komisaun Rekrutamentu Kadetes foun 2025 Komandante Antonio da Luz
Nia salient, materia ne’ebé sei fó sai iha ezame hamutuk 6 hanesan Tetun, Portuges, Geografia, Istoria, Matematika, no Konstituisaun RDTL, nune’e prepara-an ba hodi bele pasa, ezame sei iha mós dezenvolvimentu palavra ka hakerek liafuan to atus rua (200 palavras), tanba ne’e mak kandidatu sira tenke prepara Lapizeira kor azul hodi hakerek.
Nia konklui kona-ba materia ne’ebé prepara husi Sekretariadu Rekrutamentu servisu hamutuk ho Ministeriu Edukasaun. no ezame hotu sei halo koreksaun ho Sistema. Sekretariadu Rekrutamentu garantia katak materia sira ne’e sei la fó sai ba publiku (bocor).
Reportajen : Domingas
Foto : Domingas