Dili, 04 Juñu 2025 (Média Democracia) – Sekretáriu Estadu Terras no Propriedade Jaime Xavier hateten, espera husi treinamentu ne’ebé ho durasaun tempu kleur ne’e bele dezenvolve di’ak liu sistema online iha nasaun Timor-Leste ba futuru.
Nia dehan, depois forma tiha Governu dasia ne’e Embaixador Korea no Koica hala’o vizita ida ba iha Sekretáriu Terras no Propriedade nia fatin, entaun iha tempu ne’ebá hanesan oportunidade di’ak ida Terras hodi husu ba Embaixador nain rua ne’e atu fó apoiu ba Terras Propriedade, tanba iha hanoin ida katak atu dezenvolve di’ak liután sistema online sira hanesan website online, database nomos oinsa uza drone ba halo mapamentu iha nasaun Timor atu nune’e hanesan mós nasaun seluk.
“Iha tempu ne’ebá ami diskute ho Embaixador nain rua no sira husu katak saida maka ami bele fó hodi apoiu ba ita-boot sira, entaun iha oportunidade ne’ebá ami husu katak ami nian hakarak ne’e dezenvolve informasaun ne’ebé hanesan ema nasaun seluk uza sistema online de’it la presiza uza manual, entaun iha ne’ebá kedas Embaixador nain rua ne’e dehan mai husu formador husi nasaun Korea Sehsub Han Advisor husi Nipa hodi fó treinamentu ba Website, Drone, Database.” Dehan Sekretáriu Estadu Terras no Propriedade Jaime Xavier
Nia hatutan, ba drone ne’ebé foti mapamentu daudaun ne’e uza drone kiik, no sei iha mós drone ne’ebé ho nia medida boot, maibé tenke iha autorizasaun hodi bele sukat rai, entaun husi tekniku sira hanesan ne’e mak Mr. Han fó treinamentu ba formadu sira durante tinan ida hodi aprende kona-ba oinsa maneira uza drone hodi halo mapamentu, funsionariu sira halo rasik database nomos kria website online, entaun husi treinamentu durante tinan ida ne’e, ohin loron sira mai aprezenta resultadu husi sira aprende.
“Haree fali ba iha drone ne’e funsionariu sira mós hatene ona uza hodi halo mapamentu no ita mós sosa ona drone ida atu bele fasilita ba halo mapamentu nian, husi ne’ebá ita bele dehan katak ita-nia tekniku sira husi Terras no Propriedade ne’e avansadu tebes.” Hatutan Sekretáriu Estadu Terras no Propriedades
Nia informa, formadu sira ne’ebé tuir treinamentu ne’e hamutuk haatnulu, maibé dalaruma mós tekniku sira ne’e balun la partisipa masimu, tanba iha atividade balun ne’ebé sira presiza ba, maibé husi treinamentu ne’e sira bele halo mudansa ituan iha futuru, tanba Terras iha hanoin ida katak tenke dezenvolve nasaun Timor-Leste hanesan mós nasaun seluk.
Hatutan husi Formador Advisor Nipa husi nasaun Korea Sehsub Han hateten, seminariu ba loron ohin nian ne’e terminasaun ba iha treinamentu ne’ebé hala’o durante tinan ida iha Terras Propriedade, tan ne’e ohin seminariu refere hanesan terminasaun nune’e formandu sira mai halo aprezentasaun ba iha materia ne’ebé sira aprende durante tinan ida.
“Konkluzaun husi treinamentu ida ne’e maka atu fasilita formadu sira husi tekniku Terras Propriedade atu aprende oinsa atu uza drone ba halo mapamentu nomos kria website online ba database nian, ho treinamentu durante ne’e materia hirak formandu sira aprende ho di’ak tebes no sira bele kria rasik ona website no uza drone ba foti imajen hodi halo mapamentu.” Hatutan Formador Advisor Nipa husi nasaun Korea Sehsub Han
Nia dehan durante treinamentu refere iha difikuldade barak hanesan dalaruma fofoun formadu sira seidauk domina iha operasaun drone nomos website, maibé sira esforsu aprende nafatin hodi hatene. Iha fali difikuldade seluk mak, iha treinamentu ba pratika nian eletrisidade mate lakan entaun ne’e prejudika ba iha formandu sira bainhira atu kria website.
“Apoiu husi Embaixador Korea ne’e hanesan fó kapasitasaun ba ita-nia funsionariu sira oinsa atu kria website database nian kada diresaun atu nune’e diresaun sira labele uza manual maibé sira uza sistema online deit, nune’e hafasil servisu iha Terras Propriedade.” Informa Formador Advisor Nipa husi nasaun Korea Sehsub Han
Esperansa ba futuru liuhusi treinamentu ida ne’e formandu sira bele aplika materia sira ne’ebé durante sira aprende ona iha treinamentu ho durasaun tempu naruk, nomos husi esperensia hirak ne’e sira bele dezenvolve di’ak liután sistema website online ba database nomos operasaun ba iha drone hodi foti imajen halo mapamentu iha nasaun Timor-Leste.
Reportajen : Domingas
Foto : Domingas