Dili, 23 Abril 2025 (Media Democracia) – Sekretáriu Jerál Partidu Fretelin Marí Alkatiri ho Prezidente Partidu Fretelin Francisco Guterres Lu-Olo no nia espoza partisipa iha Misa Requem ba Sua Santidade Papa Francisco nia falesimentu iha Igreja Sé Katedral Dili.
Sekretáriu Jerál Partidu Fretelin, Marí Alkatiri hateten, Amu Papa mai iha mundu ne’e lori mensajen ida ba mundu no ba ema hotu, nia fiar katak Amu Papa tuir mai ne’e sei komprende katak mundu muda ona presiza atu hotu-hotu hamutuk salva uma komunidade tomak.
“Ha’u hanoin Amu papa husik mensajem furak ba ita, primeiru dehan povu mak ita-nia rikusoin segundu ba joven sira no labarik sira, terseiru Ami katuas sira, mensajem ikus para ami rasik bele halo reflesaun para hatutan tan Amu Papa nia preokupasaun ne’e, Sua Santidade ida ne’e marka historia foun ba mundu tomak laos deit ba katolika no la’os de’it ba kristaun no ha’u fiar katak se deit mak troka no sai Amu Padre bele hatutan tan memoria papa nian.” Dehan Sekretáriu Jeral Fretelin Marí Alkatiri ba jornalista sira hafoin partisipa misa Requem ba Santu Padre iha Igreja Sé Katedral Dili Tersa feira ne’e (22/04/2025)
Iha fatin hanesa Prezidente Partidu Fretelin Francisco Guterres Lu-olo espresa nia sentimemtu hodi dehan, Sarani katólika lakon nia lider boot ida ne’ebé nakonu ho hanoin no hahalok di’ak.
“Ha’u hanoin ita lakon lider boot ida ne’ebé nakonu ho domin no nia hahalok di’ak ba ema hotu, tantu sarani katolika no komunidade internasional tomak.” Dehan Prezidente Partidu Fretelin Hafoin Partisipa misa Requem
Prezidente partidu ne’e haktuir mensajen Sua Santidade Papa Francisco nian bainhira Vizita Timor-Leste iha tinan 2024 katak importante liu mak kria paz no fraternidade ne’e importante liubá ema hotu tenke lori nafatin, ida seluk mak Amu Papa hateten Riku soin Timor-Leste nian mak ita-nia povu ne’e rasik, importante liu mak oinsá haree ita-nia povu ne’e bele moris di’ak. nia mensajen hotu ne’ebé nia ko’alia iha Tasi-Tolu ne’e, ba Lu-Olo rekoñese katak nia aprende buat barak husi Mensajen Sua santidade Papa Francisco.
Iha biban ne’e Filomeno Martins da Silva hato’o nia sentimentu ba falesimemtu Papa Francisco nian hodi dehan iha momentu ne’e sarani katólika mundu tomak rona notísia kona-ba falesimentu Sua Santidade Papa Francisco nian sente triste no lakon tebes lider Katóliku.
“Ohin igreja katólika iha nia Diosezee Dili, iha parku Sé Katedral Dili nian ohin hahú ona halo misa ida ne’e ba misa matebian ninian ne’ebé hotu-hotu fó presta homenajen ba ita-nia Papa ne’ebé mate ona.” Filomenu Espresa
Nia dehan liuhusi Evanjellu no Omília husi Amu Selebrante ko’alia barak kona-ba Santu Padre nian hateten katak, maske Amu Papa mai vizita Timor iha tempu badak nia laran durante loron-tolu maibé husik hela memória Domin boot ida ba sarani tomak iha Timor-Leste liuliu ba mensajen sira ne’ebé amu Papa husik hela ne’e hanesan memória ida ba ema hotu atu banati tuir.
“Ha’u hanoin mensajem sira ne’e ohin repete fali buat ne’ebé Amu Papa mai hato’o ona iha ninia peregrinansaun mai vizita iha kreda Timor Leste, ohin ha’u hakarak halo orasaun ba Amu Papa nia klamar no ita reza mós ba ita hotu, tanba mensajem ne’ebé fó ba ita ne’e hanesan orientasaun ka matadalan ida ba ita atu banati tuir.” Nia espresa
Nia dehan, maske Santu Padre mai ho lalais maibé nakonu ho mensajen ne’ebé ho valor boot tebes ba ema hotu atu lao tuir, liuliu liga ho ita ema nu’udar sarani nia moris iha vida kristaun katolika, liga ho kultura ne’ebé ita adopta iha sosiedade Timor ninian, ida ne’e mensajen tolu ne’ebé ohin Amu Paroku koalia maibé reflesaun ida ne’e liga mós ba mensajem sira ne’ebé Amu Papa husik hela mai ita nu’udar sarani katólika.
Nia hatete katak ema hotu sente triste ho Amu Papa nia mate ne’e, maibé nu’udar ema sarani fiar na’in ita reza nafatin atu Santu Padre nia klamar bele ba lalehan, nomos nia husu ba sarani hotu atu reza mós ba kreda Timor tanba antes Santu Padre fila ba Vatikanu nia husik hela mensajen ida.
“Nia dehan povu ida ne’ebé nia hadomi tebes mak sarani Timor, kreda Timor ne’ebé sempre hamnasa no kontente hela de’it, ida ne’e mensajem ke di’ak, oinsa ita atu kuidadu nafatin ita-nia Fé nu’udar sidadaun kristaun katolika maibé mós Fé hodi haforsa mós Ita-nia kultura hanesan mensajem ida ne’ebé ita opta no utiliza.” Nia dehan
Filomeno Martins da Silva espera, Amu Papa foun ida sei mai ne’e seidauk hatene sei sente hanesan iha nakukun laran maibé depois de loron 15 mak foin halo konklake ka halo eleisaun ba hodi hili Amu Papa foun, nia dehan la fasil atu hili Amu Papa foun, tanba prosesu sira ne’e rigorozu tebes tanba Cardeal sira ne’ebé atu kandidata-an ba ne’e ho idade 80 mai kraik, espera iha eleisaun ba Papa foun buat hotu la’o ho di’ak, nune’e sarani katólika iha mumdu bele iha ona lidér katóliku.
Reportajen : Estefania
Foto : Estefania