Dili, 27 Maiu 2025 (Média Democracia) – Provedor dos Direitos Humanos e Justiça (PDHJ) “sigla portuges” selebra aniversariu ba dala-21 iha biban ne’e publika mós relatoriu iha tinan 2024 nia laran kona-ba sela barak la hetan asistensia legal, atividade ne’e hala’o iha edifisiu PDHJ Caicoli Dili segunda semana ne’e.
Provedor dos Direitos Humanos e Justiça, Virgílio da Silva Guterres “Lamukan” hateten, ohin selebra aniversariu PDHJ nian atu fó sai mós relatóriu Provedoria dos Direitos Humanos e Justiça (PDHJ) nian tinan 2024 nia laran.
“Relasiona ho monitorizasaun no investigasaun ne’ebé PDHJ halo iha tinan 2024 nia laran, iha buat balun ne’ebé ami anota, pur-ezemplu, iha dadur balun la hetan asisténsia legál ka laiha advogadu. Aleinde ne’e mós dadur sira la hetan asistensia legál nomos sira la hetan asistensia saude nian iha prizaun laran durante iha dadur nia laran.” Dehan Provedor dos Direitos Humanos e Justiça, Virgílio da Silva Guterres “Lamukan”
Provedoria hatutan relasiona ho failansu hirak ne’e hatudu katak iha prizaun Suai, pur-ezemplu, hahú husi Janeiru to’o Fevereiru 2024, dadur sira kuaze la hetan fasilidade hanesan sabaun, pastadente no suply hahán loron-loron atrazadu husi kompaña ne’ebé toma konta.
“Relasiona relatóriu PDHJ ba identifika iha Komandu PNTL nia servisu fatin liu-liu iha sela detensaun eskudra polísia iha Postu-Administrativu 65, kondisaun ladi’ak no sela iha Komandu Polísia iha Munisípiu 13 haree ba kondisaun la di’ak atu detein prizuneiru sira iha sela laran fó impaktu mós ba saude.” Dehan Provedoria
Provedoria salienta relasiona ho relatóriu PDHJ 2024 mensiona katak iha parte boa governasaun nian liu-liu ba rekursu operasionál sai dezafiu ba Komandu PNTL atu halo servisu ne’ebé ho responsabilidade no profisionál.
“Bazeia Relatóriu investigasaun kriminál nian ne’ebé PDHJ halo iha 2024 nia laran, rejistadu kazu krime hamutuk 32, barak envolve husi membru PNTL no profesór sira liga ba violénsia eskolár. Enkuantu, ba PNTL ne’e liga ba fó sansaun ba infratór sira hanesan iha Manufahi, polísia tránzitu kastigu joven ida hodi see nia tilun ba knalpot depois gás to’o joven nia tulun infesaun tiha. Ami husu ba Ministériu Interiór no Komandu Jerál atu tau-atensaun hodi rezolve kestaun sira-ne’e.” Haktuir Provedoria
Provedoria ne’e mós relata relatóriu PDJH deteta katak iha duni problema ai-moruk iha Hospital Nasional Guido Valadares (HNGV), liga ba stoke ai-moruk la iha. Aleinde iha mós problema balun kona-ba governu la aumenta kontratu ba profisional saude 2000 resin.
Relasiona susesu PDHJ nian durante ne’e mak sai ona hanesan membru planu ba Aliansa Globál ba instituisaun direitu umanu. Nune’e tinan-tinan PDHJ bele ko’alia iha fitun mundiál hodi reprezenta Timor-Leste iha Organizasaun Nasaun Unida.
Iha sorin seluk Defensór Públiku Jerál, Câncio Xavier hatan ba problema hirak ne’e relasiona ho relatoriu ne’ebé PDHJ halo fiskalizasaun iha prizaun tolu hanesan Bekora, Gleno no Suai, durante ne’e prizioneiru sira infrenta duni problema ba nesesidade loron-loron nian.
“Haree ba relatoriu ne’ebé PDHJ indentifika, Defensór Públiku Jerál hanesan parte integrante iha membru advogasia ba prizaun nian. Ami kontinua nafatin tau atensaun ba relatoriu sira ne’ebé mai PDHJ hanesan membru rede advogasia nafatin tau atensaun nune’e ba futuru bele hadi’a di’ak liután.” Dehan Defensór Públiku Jerál, Câncio Xavier
Defensór hatutan kapital humanu sei dook husi espetativa maibé aborda atu hadia ba kondisaun hirak ne’e bainhira iha rekursu ne’ebé naton, fiar katak ba futuru sei rezolve problema ne’ebé daudaun ne’e infrenta hela, tanba ba oin ida-idak sei responsabilidade rasik ba kliente sira.
Esplika liután problema sira hanesan ne’e PDHJ sempre simu no rejista fila-fali ba ita-nia rekursu. Maibé daudaun ne’e Defensoria Públika iha de’it defensór na’in-34. Iha biban ne’e hakarak husu mós ba Governu atu aumenta tan rekursu umanu iha Defensoria Públika, nune’e ba futuru bele rezolve kestaun hirak ne’e.
Reportajen : Nelfiano
Foto : Nelfiano