Dili, 02 Maiu 2025 (Média Democracia) – Konfederasaun Sindikatu Timor-Leste (KSTL) halo long march komemora loron mundial traballu 2025 ho “tema promove traballu dignu nu’udar sentru ba dezenvolvimentu sosial no ekonomia iha Timor-Leste, atividade ne’e realiza iha Kinta semana ne’e
Vise KSTL, Serafico Soares hateten, ohin KSTL hamutuk ho traballador selebra loron 01 Maiu nune’e marsa lao ain husi Bemori ba to’o Palacio Governu Tasi-ibun, selebrasaun ida ne’e laos iha Timor-Leste de’it maibé mundu internasional hotu-hotu selebra atu koalia sai ezijensia sira ne’ebé durante ne’e traballador sira infrenta.
“Ita nia traballador sira iha Timor-Leste infrenta injustisa barak ne’ebé loron-loron traballador sira sempre hasoru tanba ne’e loron importante tebes ba traballador sira iha Timor-Leste atu nune’e tun iha estrada atu ezizi no halo estetmentu politika ba ita-nia ukun na’in sira parte ida ne’e atu selebra de’it loron mundiál traballador.” Dehan Vise KSTL, Serafico Soares
Nia hatutan KSTL hanesan reprezentante oraganizasaun sentral iha Timor-Leste unika sai mahon ba organizasaun sira iha setór hotu-hotu
“Husu ba setór jeral hanesan traballador domestika, iha loja no konstrusaun, setór eletrisidade, setór maritima,setór, transporte, setór enerjia, nune’e ita hotu mai hamutuk atu koalia kona-ba diretu ne’ebé durante ita budu de’it iha ita-nia laran. Tinan ne’e ita hakarak atu expresa sai sentimentu durante hetan dezkriminasaun tanba ita-nia mak fó dalan ba inverstor atu dezkrimina diretu traballador nian.” Dehan nia
Nia afirma ezijensia importante liu iha loron ida ne’e pontu primeru tenke hasa’e traballador nia salariu minimu tanba salariu minimu husi 115 ba 150 dolar ne’e prosesu durante tinan 13 nia laran ona seidauk iha mudansa entaun governu laiha seriadade fó protesaun ba traballador sira-nia diretu tanba traballador presiza tebes ema atu defende sira-nia diretu
Iha fatin hanesan reprezenta traballadora, Madalena lay da Conceição Dias hateten kada tinan selebra loron mundial traballu sente di’ak teb-tebes iha oportunidade ida ne’e hanesan traballador atu expresa sai sentimentu ne’ebé durante infrenta liu-liu ba salariu minimu
“Durante ami mai hakilar iha ne’e tanba ami nia saláriu minimu nian dalabarak ami nu’udar trabalhador governu nunka tau matan mai ami no ami hakilar tinan barak ona maibé ami nia saláriu ne’e la sa’e ida hamenus nafatin ami nia saláriu di’ak ida ami servisu la hatene tuir oras maibé ami nafatin esforsu aan tanba nesesidade.” Dehan reprezenta traballadora, Madalena lay da Conceição Dias
Nia hatutan ami tama tuku 7.00 dader sai tuku 9.00 kalan hanesan feto trabalhador ba uma laran tomak antes atu sai servisu tenke prepara mós hahan ba patraun no hadia uma laran nian hotu hafoin fila ba uma ho transporte rasik ne’ebé husu ba governu tenke tau matan preokupasaun hirak ne’e.
“Ami servisu iha OJTL hetan saláriu ba 115 maibé ami nia maluk balun hetan de’it salariu kada fulan mak 80 ho 70 mai kraik preokupasaun hirak ne’e ami sempre hato’o ba ami nia patraun maibé sira la preokupa ho ami nia halerik ne’ebé ami nafatin ezizi ba governu tau matan netik mai ami feto traballador sira hotu namkari iha Timor laran tomak.” Dehan nia
Nia salienta preokupasaun ne’ebé traballador infrenta nafatin husu ba governu se bele karik hasa’e netik traballador hotu-hotu ne’ebé servisu iha rai laran nia salariu husi 115 ba 150 dolar nune’e bele sustenta netik ba familia uma laran maibé nafatin moris salariu minimu sente la seguru tanba buat hotu daudaun ne’e presiza osan.
Esplika liután iha atividade selebra loron mundial traballu KSTL hambrik hamutuk ho afilia ka asosiasaun, parseru dezenvolvimentu importante sira hanesan sosiedade sivil, aktivista no estudante sira atu mai hamutuk iha fatin ida ne’e hodi koalia sai sentimentu ne’ebé durante ne’e traballador sira infrenta nune’e governu bele rejolve ba problema hirak ne’e.
Reportajen : Nelfiano
Foto : Nelfiano
Editor : Jp.Costa