Dili, 21 Outubru 2025 (Média Democracia) – Autoridade Protesaun Civil APC liuhusi Xefe Seksaun no Komunikasaun XSK realiza komunikadu imprensa kona-ba dezastre ne’ebé akontese husi loron 13-20 Outubru 2025, durante semana ida ne’e, iha rejiaun Timor-Leste normal. Konferensia hala’o iha Salaun APC Caicoli Dili, Segunda semana ne’e.
Xefe Seksaun no Komunikasau XSK, Genoveva Fernandes Almeida hateten, akontese tipu dezastre CNOPC-APC rejistu kazu dezastre hanesan, uma estragus 8, anin-sobu uma 6, ahi-han uma 2, priense kriteria 6, apoiu de’it emerjensia 2, numeru ema afetadus 38, ema evakua hamutuk 8 ualu.
“Durante semana ida nia laran akontese dezastre iha Munisípiu haat hanesan Munisípiu Baucau anin-sobu uma 3, Munisípiu Lautem ahi-han uma 1, Munisípiu Liquiça anin-sobu uma 3, Munisipiu Manatutu ahi-han komunidade nia uma 1 nune’e APC no parseru relevante ne’ebé destekadu iha Munisípiu halo kedas rejistu ba vitima afeita ba dezastre.” Dehan Xefe Seksaun no Komunikasaun XSK, Genoveva Fernandes Almeida
Xefe Seksaun no Komunikasaun hatutan, akontesimentu dezastre iha Munisípiu Baucau Postu Venilale Suku Bado-ho’o, Aldeia Uataula, iha loron 14/10/2025 akontese anin-sobu komunidade nia uma 1, att naton. Iha Postu Laga Suku Tequinaumata, Aldeia Bulabai, iha loron 17/10/2025 akontese anin-sobu komunidade nia uma 1, att kaman. Suku Tequinaumata, Aldeia Kaikasalari, iha loron 20/09/2025 akontese anin-sobu komunidade nia uma 1, at naton.
Iha Municipiu Lautem Postu Iliomar Suku Caenlio, Aldeia Larimi, iha loron 13/10/2025 akontese ahi-han komunidade nia uma 1, att total. Iha Munisípiu Liqueça Postu Liqueça villa Suku leotala, Aldeia Lepa, iha loron 17/10/2025 akontese anin-sobu komunidade nia uma 1, att Kaman.
Xefe Seksaun afirma Postu Loes Suku Quico, Aldeia Vatuvei, iha loron 16/10/2025 akontese anin sobu komunidade nia uma 1, hetan de’it apoiu emerjensia. Suku Lisadila, Aldeia Darulema, iha loron 16/10/2025 akontese anin-sobu komunidade nia uma 1, hetan de’it apoiu emerjensia. Aleinde ne’e Munisipiu Manatuto Postu Laclo Suku Uma naruk, Aldeia Bua, iha loron 13/10/2025 akontese ahi-han komunidade nia uma 1, aat total.
Esplika liután daudaun ne’e Komandu APC Munisípiu ho parseirus relevante fornese asistensia emerjensia ba familia afetadus sira hanesan Ai-han no laos Ai han (food item & Non-food Item). Komandu Operasional Autoridade Protesaun Sivil (APC) Munisípiu sira sei kontinua halo hela levantamentu detaillus kona-ba sasan ne’ebé estragus no lakon.
Reportajen : Nelfiano
Foto : Nelfiano