Dili, 18 Fevereiru 2026 (Média Democracia) – La’ós de’it fa’an sasan iha dalan ninin, maibé fa’an mós esperansa ba futuru ne’ebé nia rasik hakarak, loron ida bele kole, maibé hanoin katak mundu ida sei haree nia luta, tanba iha liman kiik ne’e, iha forsa boot ida ne’ebé sei muda moris. Madalena da Silva ho idade 22 husi Munisípiu Viqueque Postu-Administrativu Ossu daudaun ne’e hela iha Suku Bairo-Pite Aldeia 5 de Outubru, loron-loron sempre halo atividade negosiu ki’ik iha dalan ninin hodi bele hetan osan ituan responde ba nesesidade uma laran.
Negosiante ambulante, Madalena da Silva hateten, daudaun ne’e halo atividade negósiu ki’ik iha dalan ninin, nune’e bele hetan osan hodi sustenta ba nesesidade loron-loron nian, nomos suporta alin sira iha nível eduksaun.
“Sasan ne’ebé ha’u fa’an hanesan, Sigaru no Pulsa ida-ne’e atu responde ba nesesidade uma laran nian. Aleinde ne’e suporta mós alin sira ba eskola no bainhira sira presiza, tanba sasan ne’ebé ha’u fa’an kada loron hetan $10 to’o $15 dolar, maibé haree mós ba situasaun hanesan iha tempu udan dalaruma sasan folin to’o de’it $5 dolar, tanba situasaun udan nomos ema barak halo atividade negosiu ki’ik iha dalan ninin.” Dehan Madalena
Nia hatutan, bainhira atu ba fa’an sasan iha tempu dadersan tenke ajuda uluk nia bin boot hodi halo servisu uma laran nian, depois halo servisu hotu iha oras 9.00 otl liu foin bele ba fa’an sasan. Maibé dalaruma alin sempre ajuda lori ba fa’an uluk sasan iha fatin negósiu nian.
“Osan ne’ebé lori halo atividade negósiu ki’ik ne’e hetan suporta no apoiu liuhusi maun ho bin sira-nia ajuda inklui tama mós iha grupu Moris Rasik (MR), no osan ne’ebé ha’u kreditu ho total $300 dolar Amerikanu ne’ebé kada semana tenke setór ho osan $13.05, tanba ne’e tenke esforsu-aan hodi buka nafatin osan, nune’e bele setór fila-fali.” Hatutan Madalena
Esplika liután, durante ne’e Madalena hala’o nia atividade negosiu loron-loron iha iha dalan ninin maske ema barak halo negosiu maibé ida ne’e la sai problema ba nia, tanba liuhusi ida-idak nia badinas de’it kada loron sempre hetan osan, se tur de’it iha uma osan sei la mosu ne’eduni tenke esforsu-an maske loron ida hetan ho rendimentu ne’ebé ki’ik, maibé ida ne’e bele ona responde ba familia uma laran nian.
Reportajen : Nelfiano
Foto : Nelfiano