Dili, 12 Novembru 2025 (Média Democracia) – Federasaun Futeból Timor-Leste (FFTL) realiza komunikadu imprensa hodi atuliza informasaun kona-ba kompetisaun ho naran Tasa Liga FFTL iha fulan Dezembru tinan-ne’e. Konferensia ne’e hala’o iha Salaun FFTL, Bairros dos Grilos, Tersa semana ne’e.
Adjuntu Sekretáriu Jerál FFTL, Fernando Xavier hateten, kona-ba planu kompetisaun nu’udár parte kumpri kompromisu ne’ebé fó-sai husi Prezidente FFTL, Nilton Gusmão bainhira hala’o kongresu anuál iha fulan agustu liubá kotuk.
“FFTL rasik mak sei organiza kompetisaun iha tinan-ne’e no tasa referida sei finansia direta husi Prezidente FFTL. sei partisipa husi klube futeból iha segunda no primeira divizaun Liga Futeból Timor-Leste ho totál klubu 13 kompostu ualu (8) husi primeira divizaun no lima (5) husi segunda divizaun.” Dehan Adjuntu Sekretáriu Jerál FFTL, Fernando Xavier
Adjunta afirma, FFTL liuhusi Komisaun organizadora iha semana ne’e sei hato’o karta konvite ba klubu partisipante sira atu partisipa reunaiun téknika hodi koalia kona-ba regulamentu jogu antes hahú kompetisaun iha fulan dezembru nia laran.
Iha fatin hanesan, Diretór Kompetisaun FFTL, João Campos relata, objetivu husi kompetisaun ne’e atu evalua atividade klubu sira durante tinan ida-ne’e liu-liu ligadu ho jogadór sira tanba hafoin Liga Futeból Timor-Leste remata atividade jogu paradu total, nune’e presiza iha kompetisaun hodi bele ajuda hasa’e kualidade jogadór sira iha Timor-Leste.
“Ha’u atu hateten kona-ba totál orsamentu ba realizasaun kompetisaun ita sei anúnsia iha reuniaun téknika ho klubu sira. Komisaun organizadora husu ba klubu 13 atu prepara-aan liuliu halo rejistrasaun no partisipa másima iha reuniaun téknika hodi esklaresidu kona-ba sistema no regulamentu jogu antes realiza drawing, inklui abertura ba kompetisaun Tasa Liga FFTL.” Dehan Diretor Kompetisaun FFTL, João Campos
Diretor informa, kona-ba klubu 13 ne’ebé sei partisipa iha kompetisaun Tasa Liga FFTL kompostu husi Karketu Dili FC, Emanuel FC, Coração FC, AD SLB, Porto Taibessi, Assalam FC, DIT FC, As Marca, Aitana FC, Nagardjo, Aitana, FIEL, Santa Cruz no Lika-Lika FC.
“Prepara orsamentu rihun 35 ba klubu vensedór. Komisaun Organizadora iha planu sei prepara prémiu hamutuk rihun $35 ba klubu neʼebé sai kampiaun (vensedór) ba Tasa Liga FFTL 2025. Orsamentu ne’e parte FFTL hetan apoia husi kompañia Esperansa Timoroan (ETO) Group iha-neʼebé sei aplika meiu kompetisaun durante fulan-ida.” Informa Diretor Kompetisaun FFTL
Diretor haktuir, komisaun mós sei prepara bonus ba klubu iha kada jogu ho sistema meiu kompetisaun ne’ebé klubu sei koloka ba grupu hamutuk haat ne’ebé sei deside liuhusi reuniaun téknika no dada númeru sorteiu antes abertura jogu.
Eaplika liután komisaun organizadora mós planeia katak hafoin remata preparasaun téknika, kompetisaun refere sei hala’o kada semana ho durasan loron haat hanesan husi Kinta to’o Domingu.
Reportajen : Nelfiano
Foto : Nelfiano