Dili, 13 Maiu 2025 (Média Democracia) – Sekretáriu Estadu Asuntu Toponímia no Organizasaun Urbana (SEATOU), iha tempu badak nia laran sei kontinua halo alargamentu ba uma-kain 200 iha Tasi-tolu, durante ne’e tau ona markasaun ba iha despezu administrasaun, depois prosesu servisu alargamentu iha Kulu-hun to’o Fatu-ahi remata.
Sekretáriu Estadu Asuntu Toponímia no Organizasaun Urbana, Germano Santa Brites Dias hateten katak iha tempu badak nia laran uma-kain atus-rua 200 iha Tasi-tolu ne’ebé markasaun ona sei hetan despezu administrasaun.
“Antes Amu Papa atu mai vizita Timor-Leste iha tinan kotuk atu selebra misa iha altar santu Tasi-tolu. Tanba ne’e, ita haka’as-aan hadi’a tiha fatin ne’e hodi halo altar hodi misa, nomos foin daudauk ne’e ita kontinua hamoos fatin ne’ebá atu bele halo misa ba fúnebre Amu Papa nian.” Dehan Sekretáriu Estadu ba jornalista iha aldeia Moris Foun, suku Komoro semana ne’e
Sekretariu Estadu hatutan solusaun ba uma-kain 200 ne’ebé markasaun, bainhira servisu alargamentu estrada Kuluhun ba Fatuahi ne’e la’o loos no hotu ona foin ita halo fali servisu iha fatin seluk ne’ebé tau ona markasaun ne’e tanba mandatu XI Governu nian sei hela tinan rua ka tolu tan, nune’e sei halo servisu tuir planu no programa ne’ebé iha.
“Tuir planu programa XI Governu nian liuhusi SEATOU ita sei kontinua halo servisu ne’ebé iha, Aleinde servisu sira ne’e presiza hala’o neneik no la’o ho di’ak atu nune’e labele mosu dezentendimentu ruma iha terrenu.” Dehan Sekretáriu Estadu
Nia afirma maske durante ne’e iha komunidade balun mak la koopera hodi kontinua harii uma iha altar santu Tasi-tolu nia kotuk, maibé daudaun ne’e fó ona avizu ba komunidade sira kuandu halo uma iha fatin refere iha tempu badak sei mosu alargamentu.
“Baninhira komunidade ne’ebé sai vitima ba eviksaun mak hetan ona osan indemizasaun tenke buka fatin ne’ebé seguru hodi halo uma, nune’e bele hadok-an husi risku ruma, Bainhira komunidade nafatin halo uma iha fatin proibidu fó avizu tenke sobu uma ne’e ba harii iha fatin seluk ne’ebé seguru kuandu sira lakoi sobu entaun SEATOU mak sei sobu no sira tenke lakon leet de’it ba sasan tanba governu apoiu dala ida de’it.” Nia haktuir
Nia informa se mak iha osan ba kuda fali osan iha fatin risku ne’e ninia problema, tanba governu iha dadus kompletu nune’e sei kontrola buat ne’ebé rigorozu. Durante ne’e governu ajuda tiha ona, ne’eduni husu ba komunidade sira labele ba halo tan uma iha fatin risku no fatin ne’ebé governu bandu.
Esplika liután Sekretáriu Estadu Asuntu Toponímia Organizasaun Urbana hamutuk ho ekipa konjunta, daudaun ne’e kontinua halo servisu iha kapital Dili inklui Munisípiu hotu atu halo dezenvolvimentu iha rai laran. Aleinde ne’e husu ba komunidade sira-hotu atu akompaña no koopera ho Estadu atu hala’o servisu hodi bele dezenvolve ita nia rai laran.
Tuir observasaun husi jornalista nian iha terenu, daudaun ne’e SEATOU hamutuk ho ekipa konjunta kontinua halo servisu maka’as iha terenu hanesan kee bee dalan no alargamentu ba espasu publiku iha kapital Dili, nune’e futuru bele halo dezenvolvimentu iha Timor-Leste.
Reportajen : Nelfiano
Foto : Nelfiano
Editor : JP.Costa