Dili, 18 Jullu 2025 (Média Democracia) – Komandu Polísia Nasional Timor-Leste (PNTL) liuhusi Diresaun Servisu Investigasaun Kriminal Nasional (DSIC) iha loron 15 fulan Jullu tinan 2025 detein suspeitu Timoroan Kazal ida ne’ebé suspeita forte envolve iha Krime “Online Shopping Scam” hanesan liman ain husi suspeitu prinsipal sira iha estrangeiru.
Tui Porta-voz Ofisial Komandu PNTL Superintendente Polísia João Belo dos Reis hateten, iha Konferensia Imprensa ne’e katak iha loron 14 fulan Jullu tinan 2025, DSIC simu keixa husi sidadaun Timoroan ida ne’ebé sente ofendidu ba transasaun iha online autor sira husi estrangeiru nian.
“Iha loron horseik (15) ekipa DSIC ne’ebé lidera husi Inspetús Xefe Polísia Akilis Dias, halo operasaun, “tracking” no infiltra ba iha transasaun sira, konsege detekta nune’e ami detein Kazal ida, sidadaun Timoroan durante ne’e fasilita hanesan Agen ba suspeitu husi estrangeiru sira hodi habosok ita-nia populasaun, komunidade Timoroan barak sira sai vitima ba halalok ida ne’e.” Dehan Porta-voz Ofisial Komandu PNTL Superintendente Polísia João Belo dos Reis João Belo dos Reis
Superintendente Polísia hatutan faktus ba detensaun realiza tuir rekezitu ne’ebé hetan detekta katak suspeitu sira lansa propaganda falsu iha “Media Sosial” ho maneira publikasaun sasan baratu hanesan kareta, motor, telemovel, osan-mean no seluk tan. Entaun komunidade barak atraídu (Interesadu) ba propaganda falsu hirak ne’e hodi manda/haruka osan ba suspeitu ne’ebé iha estrangeiru.
“Modus “operanding” ida ne’e, sira uza mós Timoroan hanesan ohin ha’u mensiona katak Kazal Timoroan ida, hafoin Kazal ida ne’e fasilita informasaun no rekolla informasaun inklui lansa mós informasaun hodi atraí ita-nia komunidade sira, horseik ami hetan mós husi suspeitu ka agen iha Timor husi suspeitu estrangeiru nian, falsifikasaun ba Dokumentu Livrete (STNK) hodi atraí Timoroan sira monu ba lasu.” Hatutan Ofisial Komandu PNTL Superintendente Polísia João Belo dos Reis
Nia salienta iha maneira operasaun seluk mak suspeitu sira lansa hafoin sira (Suspeitu) rekolla tiha Kareta hirak ne’ebé Agen Formal sira fa’an (Resmi) ninian iha Timor-Leste, hafoin sira lori informasaun sira ne’e hodi habosok fali sidadaun sira katak kareta ida ne’e bele mai foti ho folin baratu ka metade husi presu ne’ebé normal.
“Haree ba kazu ne’e Komandu PNTL hakarak informa ba públiku no komunidade sira atu halo transasaun karik tenke hatene lolos fornesedor husi sasan ne’ebé ita hakarak atu hola, tenke hatene mós ninia Legalidade Normal ka la Normal, Legal ou Ilegal, tenke hatene didi’ak hafoin haruka osan ka hola, atu ita labele sai vitíma ba transasaun Online ka transasaun ilegal.” Salienta Superintendente Polísia João Belo dos Reis
Nia afirma Komandu PNTL hamutuk ho Instituisaun sira seluk no maluk Jornalista sira tenke eduka nafatin ita-nia komunidade sira hodi hatene “Krime Online” sira hotu no labele sai vitíma ba transasaun refere, nune’e labele prejudika sira nia-aan rasik
Esplika liután, Komandu Polísia Nasional Timor-Leste (PNTL) liuhusi Diresaun Servisu Investigasaun Kriminal Nasional (DSIC) realiza konferénsia imprensa iha loron kuarta feira 16/07 2025 liga ho kazu Online Shopping Scam, kazal sai liman ain ba ema estranjeiru hodi habosok sidadaun Timoroan barak sai vitima kona-ba sasan folin baratu hanesan Kareta, Motor no seluk tan.
Reportajen : Nelfiano
Foto : .Media PNTL