Dili, 19 Agostu 2025 (Media Democracia) – Sekretáriu Estadu Formasaun Profissional no Empregu (SEFOPE) realiza seremonia kona-ba despedida ho Estajiadu hamutuk nain (8) ne’ebé sei desloka ba estajiu profisional iha Jogyakarta Indonézia durante fulan 3. Serimonia despedida ne’e hala’o iha Salaun VIP SEFOPE Caicoli, Segunda semana ne’e.
Sekretáriu Estadu Formasaun Profissional no Empregu Rogério Araújo Mendonça hateten, ohin realiza atividade despedida hamutuk estajiadu nain 8 ne’ebé sei ba estajiu fulan 3 iha Jogyakarta Indonézia tanba iha fulan tolu ba kotuk loke formasaun ba joven sira hodi partisipa estajiu iha rai laran no rai liur.
“Ita hotu hatene katak, iha fulan tolu ba kotuk, ita loke formasaun ba joven sira hodi partisipa formasaun iha rai laran nomos rai liur. Nune’e parte SEFOPE hamutuk ho entidades promotor hanesan kompañia Dili Devolopment Acampany Lda, ne’ebé servisu hamutuk ho SEFOPE hodi halo rekrutamentu ba ita-nia joven foinsa’e sira ne’ebé hakarak servisu iha kompañia DDA,Lda.” Dehan Sekretariu Estadu Profissional no Empregu, Rogério Araújo Mendonça
Sekretariu Estadu hatutan, laos de’it joven sira atu husu ba servisu direita, maibé sira mós sei hola parte formasaun durante fulan tolu iha Jogyajarta depois fila-fali mai mak foin bele servisu hamutuk ho kompañia refere.
Iha fatin hanesan representante estajiadu, Jefri de Jesus Cardoso hateten, sente kontente tebes bainhira hetan formasaun husi SEFOPE nomos husi Timor Plaza katak sira loke oportunidade ida ne’e, ba joven Timoroan hotu atu tuir estajiu iha rai liur.
“Ami koko atu apply tuir prosesu duni ikus mai hetan rezultadu ne’ebé di’ak hodi hetan oportunidade di’ak ba ha’u bele partisipa estajiu iha Jogyakarta durante fulan tolu, nune’e ha’u mesak hola parte hanesan Ofisiál Jestaun, kolega sira seluk hola parte iha area ida-idak nian.” Tenik Reprezentante estajiadu, Jefry de Jesus Cardoso
Estajiadu hatutan, ho oportunidade ne’e liuhusi SEFOPE ba estajiu iha Jogyakarta bele aprende di’ak, hodi hetan esperiensia foun no aumenta kapasidade skiil di’ak liu, nune’e fila-fali mai rai doben Timor-Leste bele fahe tutan esperiensia ba maluk sira seluk bele hatene área jestaun nian.
Esplika liután, hatama aplikasaun hamutuk 200 resin maibé halo selesaun tuir formasaun liu de’it ema hamutuk (8) mane (6) no feto (2) ne’ebé sei ba estajiu iha Jogyakarta Indonézia durante fulan tolu, hola parte iha area hanesan eletrisidade, hadia forklop, hadia lift, hospitalidade nomos karpintària nian.
Reportajen : Nelfiano
Foto : Nelfiano