Dili, 29 Janeiru 2026 (Média Democracia) – Iha tinan 2025 Sekretáriu Estadu Igualidade apoiu ona osan hamutuk rihun $65, 000 ba grupu feto sira iha área rural hamutuk 30, nune’e bele realiza sira atividade hodi sustenta mós sira nia nesesidade família.
Diretór Jerál Sekretáriu Estadu Igualidade Armando da Costa hateten, durante tinan 2025 Sekretáriu Estadu Igualidade apoiu ona osan hamutuk rihun $65,000 ba grupu feto rurál sira hodi bele sustenta sira nesesidade familia nian.
“Iha tinan kotuk ami apoiu fundu rotativu hamutuk $65.000 ba grupu feto rurál hamutuk 30 husi Munisípiu 13, hodi apoiu sira-nia atividade kuda modo, suru tais, loke kios, nune’e sira hetan netik rendimentu hodi sustenta ba nesesidade família nian.” Dehan Diretór Jerál Sekretáriu Estadu Igualidade Armando da Costa ba Jornalista sira iha Suia Room,Kuarta(29/01)
Diretór ne’e hatutan, Sekretáriu Estadu Igualidade kada tinan tau osan hodi apoiu ba grupu feto sira iha Munisipiu, maibé bazeia mós ba proposta ne’ebé grupu feto sira hato’o mai iha Diresaun. Exemplu hanesan sira husu apoiu fundu ho montante hira hodi halo atividade saida, karik proposta ne’e tama hotu ona iha S.E.I maka sei halo verifikasaun ba dokumentu hirak ne’e, no ida ne’ebé mak tuir kriteira ka rekejistu sira ne’ebé S.E.I hakarak mk foin bele hetan fundus.
Diretor ne’e informa, kada grupu sira ne’e atu hetan fundu depende ba atividade grupu nian hodi fasilita sira nia atividade negósiu ne’e ba oin.
“Atividades ne’ebé importante maka suru tais, suku hena no hakiak animal hanesan fahi, manu, no atividade seluk ne’ebé fó rendimentu ba família uma laran, nune’e mós apoiu fundu ba ema Vulnerável sira liu-liu ema ho kondisaun difisiénsia sira ne’ebé la iha forsa hodi halo atividade diária, entaun S.E.I apoiu osan oituan ba sira hodi fasilita sira uza ba nesesidade loron-loron.” Informa Diretór Jerál Sekretáriu Estadu Igualidade
Nune’e iha tinan 2026 Sekretáriu Estadu Igualidade kontinua apoiu osan fundu rotativu hamutuk $800 mil ba 400 grupu feto rural. Apoiu hirak ne’ebé S.E.I fó ne’e atu reforsa feto rural sira hodi hala’o atividades negosiu, nune’e sira bele hetan rendimentu ituan hodi sustenta nesesidade familia.
Reportajen : Estefania
Foto : Estefania