Dili, 19 Marsu 2026 (Média Democracia) – Ministeriu Defeza tinan ne’e prioriza hodi estabelese baze militár norte iha Aldeia Tata, Suku Ailelo Postu-Administrativu Hatolia A Munisípiu Ermera.
Ministru Defeza Kontra Almirante Donaciano do Rosário da Costa Gomes (Pedro Klamar Fuik) hateten, baze militár ne’e sei konstrui edifisiu ida ho rezidénsia ba militár sira no projetu refere sei lansa iha tinan ida ne’e.
“Projetu refere ita atu halo iha Eremera, hodi sai hanesan baze ba Batallaun norte husi komponente terrestre nian.” Dehan Ministru Defeza Kontra Almirante Pedro Klamar Fuik iha nia knaar fatin Fatuhada Tersa ne’e (17/03/026)
Ministru Defeza Kontra Almirante hatutan, konstrusaun baze militár ne’e responsavél Mínisteriu Planeamentu Invetimentu Estrátéjiku (MPIE) liuhusi Sekretária Grande Projetu no agora dezeñu ba konstrusaun baze militár. ne’e konklui ona tinan rua kotuk no tinan ne’e sei halo lansamentu fatuk dahuluk ba konstrusaun refere, Aleinde ne’e projetu refere sei lansa iha tinan 2026 ba bairu militár ho baze militár.
Klamar Fuik informa, iha planu dezenvolvimentu Mínisteriu Defeza nian iha tinan lima tuir diretiva Minsterial ne’ebé MD hasai iha área Defeza nian ne’e fundamentál atu dezenvolve mak infrastrutura.
“Hanesan ita-boot sira hatene katak Governu iha ona tinan rua ho balun, tinan rua ba kotuk ita konseptualiza ba hanoin hotu saida de’it, mak ita hakarak iha infrastrutura ba ita-nia forsa, tanba iha tinan rua kotuk ita kompleta dezeñu ba infrastrutura militár. Depois kompletu dezeñu ba ita-nia infrastrutura sira depois tinan ida ne’e mak ita implementa.” Informa Ministru Defeza Kontra Almirante Pedro Klamar Fuik
Governante ne’e garante tinan ne’e sei hala’o lansamentu fatuk dahuluk ba konstrusaun baze militár ne’e.
“Tinan ida ne’e ha’u fiar ita komesa Ministeriu MPIE no Grande Projetu sira mak sei lansa depois mak ita sei konstrui durante tinan ida ka rua ba oin.” Afirma Pedro Klamar Fuik
Entretantu infrastrutura ne’ebé Ministeriu Defeza foku atu implementa tinan ne’e mak ba iha baze militár ida iha nivél kompañia. Nune’e kompania sira-nia membru kuandu sira destakadu ba iha área refere sira responsabiliza ba hamutuk ho familia sira hodi hela iha bairu militár nian.
Reportajen : Estefania
Foto : Estefania