Dili, 01 Setembru 2025 (Média Democracia) – Governu Timor-Leste (TL), liuhusi Ministériu Administrasaun Estatál (MAE), organiza serimonia ofisiál komemorasaun Aniversáriu Konsulta Populár ba dala-26, “ho tema Loron paz ba mundu.” Atividade serimonia ne’e hala’o iha Jardim Largo Lecidere Sabadu semana ne’e.
“Ohin ita selebra 30 Agustu 2025, nu’udar loron ne’ebé halo ita hanoin hikas tinan ruanulu resin-neen liubá, loron determinasaun ba Timoroan hotu, hahú husi Juventude ne’ebé ho idade 17, maun alin, feton naan, inan aman to’o ferik no katuas hotu. Ita hotu hakat ho firmeza ba caixa de votu hodi fó ita-nia votu, hodi ohin loron ita hamrik hanesan Estadu Independente ida iha Estadu seluk nia leet.” Dehan Ministru Administrasaun Etatál, Tomás do Rosário Cabral
Ministru Administrasaun Estatál MAE hatutan, ohin selebra Aniversáriu Konsulta Populár ba dala-26 nu’udar momentu reflesaun no orgullu nasionál ne’ebé kle’an hodi fó onra ba povu Timoroan nia determinasaun iha 30 Agostu 1999 vota ho korajen no konviksaun ba independénsia no soberania.
“Ho laran ksolok tebes ohin ita hotu hasa’e orasaun hodi agradese ba Aman Maromak liuhusi ita-nia Nai Feto Imaculada Conceição, Mahein rai doben Timor-Leste nian ba loron murak selebrasaun dala-26 loron konsulta popular.” Dehan Ministru Administrasaun Estatál
Ministru afirma, komemorasaun tinan ida ne’e ho tema “Lori Timor ba Mundu” maski Timor-Leste nu’udar illa ki’ik ida iha mundu nia matan, maibé Timor iha fuan ne’ebé boot tebes hodi hein husi tinan 1975 to’o mai tinan 1999. Durante periodu ne’e, Timoroan hotu nafatin iha esperansa no aten brani hodi hateke ba oin mezmu iha difikuldade oioin, maibé la hakiduk ba kotuk.
“Ohin loron ita selebra Konsulta Popular ba dala-26, iha momentu ne’ebé Timoroan barak mak oras ne’e sai ba rai-liur (mundu) ho movitu estudu, servisu, ba hela iha ema nia rain no seluk tan. Iha tempu hanesan, Estadu Timor-Leste mós sai ba mundu, liuhusi partisipasaun iha organizasaun internasionál sira nomos eventu espesiál iha visita Papa Francisco nian mai Timor-Leste iha Setembru tinan 2024, ne’ebé komprova ba mundu, Timor-oan nia unidade iha fé katolika.” Afirma Ministru Estatál
Ministru informa, selebrasaun loron ohin nian mai hamutuk lori dezenvolvimentu ba rai doben ida ne’e. Hotu-hotu hamutuk, esforsu atu hamenus no halakon ki’ak ho esperansa ba moris di’ak. Buat hirak ne’e hotu sei lamosu leet de’it bainhira laiha amizade entre Timoroan, nune’e husu ba sidadaun hotu-hotu atu kontinua servisu hamutuk ba nasaun nia progresu.
Esplika liután liga ho serimónia ba selebrasaun loron Konsulta Popular ba dala 26 ne’e partisipa husi Prezidente da repúblika Ramos Horta, Vise-Primeiru Ministru Ministru koordenadór Asuntu Sosiais, Membru Governu sira, Distintus Deputadu, Organizasaun Sosiedade Sivíl, Funsionáriu husi Ministériu sira, Estudante sekundáriu sira nomos Komunidade.
Reportajen : Nelfiano
Foto : Nelfiano