Kuala Lumpur, 14 Jullu 2025 (Média Democracia) – Ministru Negósiu Estranjeiru no Kooperasaun Timor-Leste, Bendito dos Santos Freitas no Vise-Ministra bá Asuntu ASEAN, Milena Rangel ho ekipa, hala’o enkontru bilateral ho Ministru Negósiu Estranjeiru Papua Nova Guiné (PNG), Justin Wayne Tkatchenko, hodi partilla esperiénsia bá malu kona-ba prosesu oinsá atu sai membru bá ASEAN iha tempu badak Timor-Leste mós sei hola parte ba iha membru permanente ba ASEAN. Enkontru ne’e hala’o iha Sentru Konvensaun Kuala Lumpur, iha marjen Enkontru Ministerial ASEAN bá dala-58 husi loron 8 to’o 11 fulan Jullu semana ne’e. Informasaun hirak ne’e Média Democracia asesu husi Via-Whatsapp Media Officer MNEK.
Ministru Negósiu Estranjeiru no Kooperasaun Timor-Leste, Bendito dos Santos Freitas hateten katak, durante enkontru Papua Nova Guiné (PNG), espresa sira nia interese maka’as iha progresu adezaun ba ASEAN ne’ebé la’o daudaun. Papua Nova Guiné destaka ninia aspirasaun kleur ona atu adere ba ASEAN no buka atu aprende husi esperiénsia no estratéjia husi nasaun aspirante sira seluk, partikularmente Timor-Leste iha navegasaun ba prosesu adezaun.
“Asuntu ne’ebé ko’alia maka tanba Indonézia nu’udar estadu membru ida husi ASEAN propoin ona PNG mós atu sai membru ba ASEAN. Aspirasaun PNG atu sai membru ba ASEAN ne’e hahú kedas iha 1976 uluk tiha ita, maibé depois sira la tama.” Dehan Ministru Negósiu Estranjeiru no Kooperasaun Timor-Leste, Bendito dos Santos Freitas
Nia hatutan, Indonézia hanesan mós nasaun membru ASEAN propoin ona Papua Nova Guiné ninia kandidatura atu bele adere membru bá organizasaun rejionál ASEAN.
Iha oportunidade ne’e, Vise-Ministra bá Asuntu ASEAN, Milena Rangel, esplika no fahe Timor-Leste nia esperiénsia husi aspetu tékniku tuir rekejitu ASEAN nian.
Nune’e hatutan husi, Ministru Negósiu Estranjeiru no Kooperasaun Timor-Leste, Bendito Freitas manifesta Timor-Leste nia prontidaun no hakarak fahe esperiénsia ho Papua Nova Guiné kona-ba preparasaun téknika hotu-hotu atu bele formaliza estatútu ofisiál hodi sai membru bá ASEAN.
“Tanba ne’e mak ami dehan, ami-nia odamatan nakloke imi bele mosu bá, ita-nian mós bele halo vizita bá sira-nian para fahe esperiénsia kona-ba preparasaun téknika molok prienxe rekizitu hotu-hotu atu bele formaliza estatútu ofisiál bá membru ASEAN.” Informa Ministru Negósiu Estranjeiru no Kooperasaun Timor-Leste
Ministru rua ne’e reafirma sira nia kompromisu atu haburas relasaun sira ne’ebé besik liután no konkorda atu hala’o vizita sira interkámbiu nian iha futuru hodi aprofunda kolaborasaun no komprensaun mútua entre nasaun rua ne’e.
Reportajen : Domingas
Foto : Media Officer MNEK