Dili, 12 Marsu 2025 (Média Democracia) – Vise-Ministra ba Asuntu ASEAN Milena Rangel dehan Timor-Leste prontu ona atu sai membru ASEAN, tanba kriteiru hitu ne’ebé fó husi ASEAN ba Timor-Leste implementa hotu ona, lia-hirak ne’e hato’o husi Vise-Ministra iha salaun konferensia Hotel Timor, tersa semana ne’e
Iha entrevista ho Vise-Ministra ba Asuntu ASEAN Milena Rangel hateten, haree ba iha adezaun Timor-Leste atu sai membru permanente ASEAN ne’e prepara kleur ona, tanba ne’e la iha ona hanoin katak seidauk prontu maibé atu dehan katak tinan ida ne’e nasaun Timor-Leste prontu ona atu adere membru ASEAN
“Timor-Leste nia adezaun atu sai membru ASEAN ne’e, tanba durante ne’e ita hala’o hela roteiro ne’ebé ita simu husi ASEAN no ita implementa hela durante ne’e atu dehan tan ita tenke prontu agora ona hodi sai membru ba ASEAN, se ita la prontu atu adere ba ASEAN bainhira tan mak ita atu prontu, bainhira tan mak buka situasaun perfeitu, bainhira mak ita atu hetan hetan tan oportunidade hanesan ne’e, bainhira ita sai ona membru ba mak ita hadia tan situasaun balun ne’ebe seidauk diak.” Nia informa
Nia hatutan dezafiu sira sempre iha maibé ida ne’e laos desvantazen, tanba governu no estadu trasa politika externa atu nunee Timor-Leste bele tama ba iha organizasaun regional ida ne’e, tanba hala’o ona estudu kompletu no koñese benefisiu lubuk ida ba povu no nasaun ba setor hotu-hotu ba mós dezenvolvimentu kapital umanu inklui sosiedade sivil sira sei gaña benefisiu lubuk ida bainhira integrasaun regional ne’e akontese
“Atu sai membru ba iha organizasaun regional ne’e sempre iha dezafiu, tanba organizasaun ida ne’ebé kleur ona avansadu tebes iha setor hotu-hotu, tan ne’e presiza ita hotu nia servisu extra maibé labele tarde tan ho dezenvolvimentu sira ne’e iha ita-nia nasaun rasik maibé geografikamente ita hola ona parte ba iha ASEAN ne’e la iha tan duvida ida, ita tenke orgullu tanba kriteiru hitu ne’ebé fó husi ASEAN mai Timor-Leste ita esforsu makas hodi atinji ona balun no iha progresu ne’ebé as.” Dehan Ministra ba jornalista Media Democracia
Nia saliente tuir lolos la iha ona duvida no nasaun Timor-Leste prontu ona atu sai membru ba ASEAN tanba informasaun sempre fahe bebeik husi Prezidente Republika husi Ministeriu Negosio Estranjeiru kona-ba adezaun Timor-Leste atu sai membru ba iha ASEAN iha tinan ida ne’e, tanba ASEAN rasik dehan Timor-Leste atinji ona progresu ida ne’ebé makas tebes
Hatutan husi Prezidente Republika Jose Ramos Horta hateten, iha ASEAN laran maioria sira nia forsa defeza sira profisional los maibé iha ida ka rua sei menus ka la diak oituan, atu halo komparasaun ho sira Timor-Leste diak los, tanba ne’e atu dehan Timor-Leste mós prontu ona atu sai membru ASEAN
“Atu dehan katak bainhira ita atu sai membru ASEAN, nasaun lubuk ida mak tulun ita-nia nasaun hanesan, nasaun Indonesia, Australia, portugal, nasaun tolu ne’e mak sempre apoiu makas Timor-Leste hodi bele adere ba ASEAN.” Dehan Prezidente Republika ba jornalista sira hafoin partisipa iha aniversariu PNTL ba dala (25).
Nia hatutan importante liu atu haree ba iha oin mak, oinsa governu hala’o hanesan infraestrutura, liuliu ba iha fronteira nune’e bele hatudu imazen diak ida, bainhira atu sai membru ba iha ASEAN, tanba ne’e polisia fronteira tenke iha kualidade no bensimentu ne’ebé diak nomos insentivu ne’ebé iha kualidade, hanesan hela fatin, mobilidade no seluk tan
Reportajen : Domingas
Foto : Domingas