Malázia, 11 Jullu 2025 (Média Democracia) – Iha okazisaun enkontru Ministeriál ASEAN ba dala 58, Ministru Negósiu Estranjeiru no Kooperasaun, Bendito Freitas hala’o enkontru bilateral ho Vise-Primeiru Ministru no Ministru Negósiu Estranjeiru Repúblika Sosialista Vietnam, Bui Tanh Son, hodi reitera kooperasaun bilaterál entre nasaun rua. Enkontru ne’e hala’o iha Sentru Konvensaun Kuala Lumpur. Parte rua diskute asuntu haat ne’ebé importante tebes ba reforsu kooperasaun bilaterál entre Timor-Leste ho Vietnam.
Ministru Bendito Freitas informa, durante enkontru, Vise-Primeiru Ministru no Ministru Negósiu Estranjeiru Repúblika Sosialista Vietnam, Bui Tanh Son kongratula no agradese ba Timor-Leste nia preparasaun tomak atu bele sai membru plenu ba ASEAN ne’ebé markadu ba loron 26 fulan outubru 2025 liuhusi simeira Xefe Estadu no Governu ba dala 47 iha fulan-outubru tinan ne’e iha Malázia.
“Enkontru bilateral ho Vise-Primeiru Ministru no Ministru Negósiu Estranjeiru Repúblika Sosialista Vietnam, Bui Tanh So, ko’alia asuntu importante haat liu-liu sira agradese ba Timor-Leste kona-ba preparasaun hotu-hotu atu bele sai membru plenu ASEAN nian, ko’alia kona-ba kooperasaun bilateral liu-liu atu haree área estratéjiku saida mak importante ba ita iha setór dezenvolvimentu ekonómiku.” Dehan Ministru Negósiu Estranjeiru no Kooperasaun, Bendito Freitas
Aleinde ne’e ko’alia mós kona-ba ajenda vizita ofisiál Primeiru Ministru Vietnam nian ba Timor-Leste ne’ebé sei hala’o iha tempu besik, nomos fó seguimentu ba vizita estadu Prezidente Repúblika, José Ramos-Horta ba Vietnam iha tinan kotuk ne’ebé la’o ho susesu tebes.
Iha enkontru ne’e, Ministru Negósiu Estranjeiru Vietnam, Bui Tanh Son husu Timor-Leste atu prepara hodi simu vizita Primeiru-Ministru Vietnam, Pham Minh Chinh iha Dili ne’ebé possibilidade sei akontese iha fulan outubru nia laran antes simeira ASEAN ba dala 47 iha Malázia.
“Vise-Primeiru-Ministru informa ba ita katak, iha planu possivelmente atu iha vizita husi Primeiru-Ministru Vietnam nian ba Timor iha fulan outubru, lolos ne’e ba vizita tiha ona iha loron 22 juñu, maibé tanba sira halo reforma iha Governu halo reduasaun ba sira-nia estrutura ezekutiva inklui asuntu internu lubuk ida, tanba ne’e la konsege vizita.” Informa Ministru Negósiu Estranjeiru no Kooperasaun, Bendito Freitas
Iha biban ne’e, Ministru Bendito Freitas sujere ba nia omólogu Bui Tanh Son, atu vizita ne;e bele realiza iha semana dahuluk fulan outubru, tanba durante fulan outubru nia laran, Governu konsentra de’it ba preparasaun ba adezaun formal Timor-Leste nian ba ASEAN ne’ebé marka ona ba loron 26 fulan outubru tinan ne’e.
Reportajen : Media MNEK
Foto : Media Officer MNEK