Dili, 03 Fevereiru 2025 (Média Democracia) – Asosiasaun Alumni Xina (TLCAA) ohin konvida estudante sira husi universidade tolu (IES) iha sidade Dili hodi tuir sesaun fahe informasaun kona-ba oportunidade atu estuda iha Xina liuhusi bolsa estudu ne’ebé fó husi governu Xina no Universidade sira iha Xina.
Universidade tolu ne’e kompostu husi DIT (Dili Institute of Technology), IPDC (Instituto Profissional de Canossa) no ISC (Instituto Superior Cristal) ho prezensa estudante no reprezentante dosente liu 100.
Tuir Prezidente TLCAA Dircio Francisco X. F. Ximenes haktuir, sesaun fahe informasaun ne’e hala’o atu fó motivasaun ba graduadu eskola sekundária (SMA) no lisensiatura (S1) sira hodi buka hatene pasu saida mak presiza hodi partisipa iha oportunidade bolsu estudu.
“Iha ne’e ami esplika ba sira saida mak sira tenke halo hahú husi dokumentu komprovativu, diploma ho grau balun no abilidade lian ingles ne’ebé di’ak.” Dehan Dircio iha entrevista ho jornalista sira iha loron sábadu, fatin Kampus DIT
Nia subliña katak TLCAA hakarak estudante Timor-Leste barak atu hola parte iha bolsu estudu ne’e no labele ta’uk atu koko tanba importante liu mak partisipante bolsu estudu sira bele ko’alia Inglés. Aleinde ne’e, dokumentu sira TOEFL (Test of English as a Foreign Language) no IELTS (International English Language Testing System) depende ba universidade ne’ebé ita-boot aplika ba, maibé balun la presiza sira.
Parte seluk tuir Dili Institute of Technology DIT Pro-Reitora Akadémika Aderita dos Santos agradese ba TLCAA ba sesaun fahe informasaun ho estudante sira no hein katak bele kontinua hala’o tinan-tinan tanba graduadu universitáriu barak mak hakarak kontinua sira-nia edukasaun iha nivel ne’ebé aas liu.
“Ami agradese tebes ba prezensa TLCAA nian no ha’u hein katak sei iha mós ema husi nasaun seluk ne’ebé sei atende hodi fó sosializasaun hanesan ne’e. Ida ne’e mós hanesan oportunidade ida ba ita-nia estudante sira ne’ebé to’o ona iha faze finál atu kontinua sira-nia estudu.” Dehan Pro-Reitora Akadémika Aderita dos Santos
Iha fatin hanesan Estudante Carlos Piedade husi Universidade Nasional Timor Lorosa’e (UNTL), Departementu Turizmu haktuir katak, Formasaun ne’ebé sira tuir ne’e realiza husi Alumi estudante Xineza, ho objetivu atu esplika oinsá mak atu aplika ba bolsu de estudu iha xina nian.
“Formasaun ne’e kapas tanba atu fó informasaun klaru liután kona-ba bolsu estudu ne’ebé estudante barak kompete atu ba estudu iha rai liur, Liu-liu oinsá mak atu aplika ba bolsu estudu ne’ebé husi xina nian, ho ida ne’e ami husi estudante sira inisitiva hakarak tebes atu hetan informasaun no hakarak hasa’e liután koñesimentu hodi bele hetan oportunidade eskola iha Xina.” Nia haktuir
Nia afirma tan Informasaun ne’ebé sira prenxe no hato’o ba ne’e kapas tebes, no dezafia sira hodi esforsu nafatin ba eskola iha xina.
“Ha’u mós hakarak eskola iha Xina, tanba esperiénsia barak ne’ebé sira fahe ohin loron ne’e, ha’u iha tarjeitu hakarak atu ba eskola iha Xina, ho nune’e ohin formasaun ne’ebé fahe husi kolega sira kapas tebes.” Nia hato’o nia Vontade.
Nia esplika liután katak iha Vontade tomak hakarak atu kompete iha bolsu estudu ninian hodi nune’e bele ba eskola iha Xina.
“Ha’u mós hakarak tebes atu aplika, karik iha sorte ha’u bele liu no la iha sorte bele kompete fali iha tinan oin tan. Tanba hakarak eskola iha Xina hodi bele aprende buat barak kona-ba Xina nia sistema ne’ebé dezenvolvidu, nune’e dezafia tebes ha’u hakarak hetan no estuda tan iha ema nia rai, nune’e mai aplika fali iha ita-nia rai laran.” Dehan Nia
Esplika kle’an liután katak, TLCAA ofisialmente harii iha loron 27 fulan Marsu tinan 2022 ho membru liu 200 no hetan apoiu finanseiru husi Embaixada Repúblika Xina iha Timor-Leste. Organizasaun ida ne’e sai hanesan plataforma ida ba antigu alunu sira atu fahe esperiénsia, koñesimentu, no abilidade sira ne’ebé hetan durante sira nia estudu iha Xina.
Reportajen : Tomas
Foto : Tomas