Dili, 24 Fevereiru 2026 (Média Democracia) – Toos ba Moris Di’ak (Tomak) lori naran Ra’es Hadomi Timor Oan (RHTO) hato’o apresiasaun sinseru ba kolaborasaun no kompromisu ne’ebé kontinua hadia agrikultura, seguransa ai-han no oportunidade ekonómika ba komunidade rurál inklui ema ho defisiénsia.
Tuir Team Leader Programa TOMAK Renato Zrnic hateten, Projetu TOMAK hala’o papel vitál ida hodi fó apoiu ba agrikultór sira atu hasa’e produtividade, diversifika ai-horis no hadia rezultadu nutrisaun.
“Bainhira ita servisu ba dezenvolvimentu rurál inkluzivu, esensiál tebes atu laiha ema ida maka husik hela iha kotuk, liuliu ema ho defisiénsia sira, ne’ebé dala barak hasoru barreira asesu ba formasaun agrikola, apoiu subsistésia no oportunidade merkadu.” Dehan Team Leader Programa TOMAK Renato Zrnic
Team Leader ne’e hatutan, enkoraja partisipasaun inkluziva iha grupu agrikultór no atividade formasaun no halo advokasia ba servisu estensaun agrikola ne’ebé asesível no inkluzivu la’os karidade inkluzaun maka direitu, bainhira ema ho defisiensia hetan asesu hanesan ba abilidade, rekursu no oportunidade, bele kontribui ho signifikativu ba família, komunidade no dezenvolvimentu nasionál, fiar katak dezenvolvimentu agrikultura sustentável tenke inkluzivu, partisipativu no bazeia ba direitu umanu. Parseria forte entre Governu mak Organizasaun Sosiedade Sivil no komunidade sira hanesan xave hodi alkansa.
Programa To’os ba Moris Di ak (TOMAK) kontente tebes atu entrega formal ba Ra’es Hadomi Timor Oan (RHTO) husi rekursu kapasitasaun, materiál treinamentu no koñesimentu institusionál, hodi rekoñese kolaborasaun ne’ebé di’ak, konstrutivu no estratéjiku ne’ebé hahú husi inisiu tinan 2023 TOMAK, no hetan apoiu finanseiru husi Governu Austrália, foka ba hadi’a moris to’os nain sira liuhusi agrikultura inkluziva, reziliente no sensível ba nutrisaun.
“Liuhusi parseria ho RHTO, ami servisu hamutuk atu integra prinsipiu Igualdade Jéneru, Defisiénsia no Inkluzaun Sosiál (GEDSI) iha sistema ai-han, partisipasaun ekonomika no prosesu desizaun iha nivel Uma-kain no komunidade.” Hatutan Team Leader Programa TOMAK
Entretantu RHTO hala’ o papel sentrál liuhusi mobilizasaun komunidade, referénsia ba servisu no dispozitivu asisténsia, apoiu iha treinamentu inkluzaun defisiénsia no kontribuisaun iha prosesu aprendizajen no adaptasaun programa total RHTO Hamutuk 2000.
Reportajem : Estajiadu Marito
Foto : Marito