Dili 14 Outobru 2024 (Media Democracia) – United Nation Population Found UNFPA servisu hamutuk ho Ministerio Saude liuhusi Diresaun Nasional Saude Materna no infantil realiza orientasaun durante loron-tolu hodi fasilita pesoal saude, orientasaun ne’e hala’o iha salaun Novu Turismo, Bidau Lecidere Dili.
Iha entrevista ho asistente reprezentante UNFPA iha Timor Leste, Domingas Bernardo, hateten atividade ohin ne’e importante tebes tanba halo abertura ba iha orientasaun durante loron-tolu ba pesoal saude sira husi munisipiu sanulu resin-tolu (13) atu sai fasilitador ba servisu Antanatal no posnatal, durante loron-tolu ne’e peritu husi Dr. José Antonio sei halo orientasaun ba pesoal saude sira ne’e kona-ba guia rua ne’ebéohin temi ona iha leten.
“Objetivu husi atividade ohin ne’e loke orientasaun ba formasaun durante loron-tolu ba pesoal saude sira ne’e hodi mai tuir orientasaun depois fila ba sira bele hatene ona oinsa atu halo planu hodi orienta fali pesoal saude balun ne’ebé la hetan oportunidade ida ne’e. Objetivu seluk mak oinsa atu hadia servisu diak liután haree ba iha Antanatal no posnatal ida ne’e atu ita ba hadia kualiadade servisu iha sentru saude nomos Postu-saude sira hodi bele reduz mortalidade inan no Bebe sira.” Dehan Reprezentante UNFPA iha Timor Leste, Domingas Bernardo
Nia hatutan servisu Antanatal no posnatal ne’e servisu iha baziku ne’e servisu rutina sira ne’ebé hala’o iha postu saude nomos sentru saude sira haree liubá iha saude maternidade infantil nian
“Orientasaun ba pesoal saude tuir fasilitador sira ne’ebé husi MS ho UNFPA halo nomos suporta fundu husi governu japaun nian, ne’e sente katak importante tebes tanba husi fundu ne’ebé boot bele ajuda ita hodi atinji no hadia kualiadade servisu sira iha tempo agora no iha futuru.” Hatutan Reprezentante UNFPA
Nia salienta fundu ne’ebé apoiu husi governu japaun projetu ba tinan tolu ho total fundu 7.5 Millaun iha marsu tinan kotuk asina akordu ho governu japaun atu halo servisu integradu hodi reforsa servisu kuidadu saude maternidade infantil, servisu hirak ne’e iha pakote hanesan Antanatal ho pakote ida no posnatal, iha pakote projetu ne’e hadia mós fasilidade saude, infraestrutura hodi bele funsiona ho diak no hasae kapasidade pesoal saude servisu iha sentru saude sira nomos hasae koñesementu komunidade sira atu bele uza fasilidade sira ho kuidadu.
Hatutan husi Deputy Head of Mission, Embassy Japan in Timor Leste, Ms. Sakai Yuki Counsellor, pontu importante husi governu japaun mak Timor-Leste bele iha dezenvolvimentu sustentavel no sira rasik mak tenke espande projetu ka programa refere
“Importante liután mak ami hakarak halo projetu ida ne’e susessu lai depois mak sei ba haree fali impaktu ne’ebé iha munisipiu sira kobre, implementasaun programa refere iha munisipiu sanulu resin-tolu ne’ebé ohin mai partisipa ona orientasaun ida ne’e.” Hatutan Deputy Head of Mission, Embassy Japan in Timor Leste, Ms. Sakai Yuki Counsellor
Iha sorin seluk husi Xefe Departamentu Saude Materna no infantil, Ministeriu Saude Dra. Lucia lay hateten, agradese tebes ba iha governu japaun ne’ebé apoiu fundu masimu ba iha Ministeriu Saude liu-liu iha Diresaun Nasional Saude Materna no infantil ne’ebé hetan suporta mós husi UNFPA ba atividade sira hanesan ohin loron realiza iha ne’e atu hateten mós katak UNFPA laos suporta iha atividade ohin deit maibé iha mós atividade entermu hanesan servisu integradu sira seluk
Entertantu atividades ohin ne’e partisipa husi Governu Japaun, UNFPA nomos Ministerio Saude atividade ne’e hala’o husi UNFPA servisu hamutuk ho governu japaun nomos Ministeriu Saude liuhusi Diresaun Nasional Saude Materna no infantil hodi fasilita orientasaun ne’e ba pesoal saude sira husi munisipiu sanulu resin-tolu durante loron-tolu iha Salaun Novu Turismo Bidau Lecidere Dili
Reportajen : Domingas
Foto Domingas