Dili, 16 Juñu 2025 (Média Democracia) – Universidade Oriental Timor Lorosa’e (UNITAL) realiza komunikadu imprensa deskonkorda ho intervensaun husi Deputadu Luis Roberto, ne’ebé levanta iha plenaria Parlamentu Nasional, kona-ba qualidade Ensinu Superior iha Universidade privados balun, ne’ebé manipula sistema inskrisaun akademiku, hodi fasilita estudante foun asesu ba ensino superior, Atividades Konferensia Imrensa ne’e hala’o iha sesta feira semana kotuk, 13/06/2025.
Porta-voz Universidade Oriental Timor Lorosa’e, Juvencio do Santos hateten, Deputadu Luis Roberto, foti UNITAL sai hanesan ezemplu ba mál administrasaun ne’ebé afeta ba kualidade ensinu ho ida ne’e UNITAL rezeita totálmente ba informasaun falsa no laloos ne’e.
“Ami akompaña intervensaun ne’ebé Deputadu Luis Roberto levanta iha Parlamentu Nasionál, kona-ba kualidade Ensinu Superior iha Universidade privadu sira, balun manipula sistema inskrisaun akademiku, hodi fasilita estudante foun asesu Ensinu Superior la iha dokumentus komprovativu, no foti UNITAL sai hanesan ezemplu ba mál administrasaun ne’ebé afeta ba kualidade ensinu.” Dehan Porta-voz UNITAL, Jovensio do Santos liuhusi konferensia imprensa ne’ebé hala’o iha kampus Unital Becora
Nia dehan UNITAL hanesan Instituisaun Superior ne’ebé parseria ho Ministeriu Ensinu Superior Siensia no Kultura no ajensia nasionál avaliasaun no akreditasaun akamemika, ne’ebé regula universidade hotu hodi aposta ba kualiadade ensinu.
Nune’e Porta-vos ne’e husu ba Deputadu ne’e atu aprezenta faktus no dadus ba MESSK, bainhira la iha faktus, sira nia parte husu ba Deputadu ne’e atu hato’o deskulpa ba estrutura universidade.
Iha fatin hanesan Reitor Universidade Oriental Timor Lorosa’e, Caludino Ninas Nabais informa, Deputadu Luis Roberto nia intervensaun la koresponde ba realidade, tanba ne’e nu’udar instituisaun akadémiku hamutuk ho komunidade tomak UNITAL nian halo reasaun no jestu akadémiku.
“Ami la presiza atu obriga atu husu deskulpa, maibé ami hakarak hanorin nia katak liuhusi instutuisaun akademika mak forma sira, tanba Deputadu balun mós gradua husi universidade ida ne’e, entaun ida ne’e hatudu katak iha kualidade mak alumni sira ne’e absolve ba orgaun estadu nian.” Dehan Reitor Universidade Oriental Timor Lorosa’e, Caludino Ninas Nabais
Reitor ne’e hatutan, UNITAL iha kualidade tuir padraun ANAAA, tanba ne’e labele kaer indikadores kualidade individu ida hodi mai sukat ba kualidade ida iha instituisaun Ensinu Superior.
“Ita iha kualidade, kualidade ne’e mai husi padraun Ensinu Superior, ne’ebé liuhusi ANAAA regularmente halo vizita mai UNITAL no universidade hotu, hodi fó sira nia konsellu no hanoin oinsa mak bele hadia kualidade ensinu.” Hatutan Reitor Universidade Oriental Timor Lorosa’e
Nia aprofunda kona-ba mal jestaun iha inskrisaun ba estudante foun sira hakat kedas ba semester 3 no balun la iha diploma ida ne’e la existe iha UNITAL.
“Ida ne’e la existe iha UNITAL, tanba sistema dizitalizasaun ne’ebé Ensinu Superior estabelese regorozu oituan, bainhira rejistra iha sistema signifika kompleta hotu ona dokumentus ne’ebé tama iha rekezitus mai iha Ensinu Superior.” Informa Caludino Ninas Nabais
Nia hateten, karik iha buat balun ne’ebé kontra regras, bele hatudu faktus depois enkamina ba iha MESSK depois mai koalia sala ne’e iha parte ne’ebé.
Enkuantu reitor ne’e mós husu ba estudante sira atu kontinua nafatin sira nia estudu no lalika rona informasaun husi liur, UNITAL prontu eduka no forma estudante sai kualidade.
Reportajen : Domingas
Foto : Domingas