Dili, 03 Juñu 2025 (Média Democracia) – Univerisdade da Paz servisu hamutuk ho organizasaun internasional Heaven world Peace (HWPL sigla ingles) nomos kolabora ho asosiasaun arte moris Timor-Leste atu promove paz liuhusi pintura iha moru lolon ho liafuan paz nian iha resintu universidade da Paz aimeti laran Dili.
Iha entrevista ho Dekanu Fakuldade Siensia Sosiais e Humanidades Fernando Diaz Gusmão hateten, ohin Universidade da Paz hamutuk ho HWPL hanesan organizasaun ida ne’ebé promove paz iha mundu, sira mai iha unpaz hamutuk ho estrutura universidade nomos kolabora ho arte moris atu hala’o atividade ida iha unpaz.
“Ita hotu hatene katak arte moris halo ona pintura ba iha moru lolon sira iha Dili laran ho tema moris hakmate ida tan mak paz iha Timor, ne’e programa ida husi HWPL nian hala’o ona desde 2003 sae mai no husi tinan 2023 ne’e sira mai hala’o ona konferensia ida ho universidade da paz hodi hakarak involve ita nia lider sira liuliu ita-nia instituisaun akademiku sira hodi partisipa atu nune’e bele promove paz iha nasaun, ita-nia rai hanesan nasaun ida ne’ebé uluk hasoru konflitu ne’ebé bo’ot, fó sofrementu ba ita-nia povu, tan ne’e ohin loron ita mós hakarak kontribui hodi harii paz iha ita-nia nasaun.” Dehan Dekanu Fakuldade Siensia Sosiais e Humanidades Fernando Diaz Gusmão
Nia hatutan haree ba iha asuntu ida ohin Universidade da Paz mós desde tinan kotuk partisipa ona iha konferensia ida ne’ebé hala’o iha nasaun korea do sul ho tema paz mundiál no agora unpaz hakarak iha instituisaun akademiku ida ne’e atu introdus liafuan paz ne’e ba estudante sira, maluk dosente sira seluk hodi hakribi violensia ne’ebé sempre fó vitima ba sidadaun seluk, no paz ne’e di’ak tebes ba ema hotu atu moris hakmatek no harmonia.
“Estudante hotu livremente atu hola parte iha atividade ne’ebé sei hala’o husi Universidade, ne’ebé kolabora ona ho arte moris Timor-Leste hodi pinta moru lolon sira ho liafuan dame nian. Universidade da Paz ne’e iha departamentu ida mós hanaran estudu ba paz no departamentu relasaun internasional, nune’e programa refere importante los ba Universidade da Paz.” Hatutan Dekanu Fakuldade Siensia Sosiais e Humanidades
Atividade pintura ne’ebé sei pinta husi arte moris ne’e la taka dalan ba estudante sira husi Universidade da Paz, karik estudante balun iha liafuan ruma kona-ba paz bele mai pinta hamutuk ho maluk sira husi arte moris.
Iha fatin hanesan Prezidente Asosiasaun Arte Moris Iliwatu Danabere hateten, haree ba iha atividade ne’ebé sei hala’o iha area Universidade nian ne’e data fiksu seidauk iha maibé hanesan Prezidente sei organiza membru sira hotu atu prepara ekipamentu sira atu uza pinta iha moru lolon area unpaz nian.
“Atividade ne’ebé ami halao ne’e laos arte moris de’it maibé sei kolabora ho pintor/a Timoroan sira ne’ebé iha talentu kona-ba pinta nian hodi mai kontribui mós sira nia ideia iha atividade ne’e, haree ba iha programa ida ne’e ami sente di’ak tebes, tanba iha koneksaun mós ho ami nia misaun ne’ebé durante ne’e ami hala’o ona, Aleinde ne’e mós arte moris senti konteten bele kolabora ho Universidade no HWPL atu bele pinta liafuan dame iha moru lolon area Unpaz nian.” Dehan Prezidente Asosiasaun Arte Moris Iliwatu Danabere
Nia informa, husi atividade hola parte iha arte moris nia misaun ne’ebé durante ne’e arte moris hala’o ona iha moru lolon balun ne’ebé arte moris pinta hela no husi atividade ida ne’e mós arte moris espera bele kolabora ideia husi pintor sira ne’ebé iha talentu no estudante sira iha Unpaz rasik.
“Agora daudaun membru arte moris iha pintor lokal ne’e hamutuk nain sanulu resin-neen (16) maka hela hamutuk iha sede arte moris nian nomos ami iha estudante hamutuk ruanulu resin-neen (26) ne’ebé daudaun ativu hela iha pinta nian, ha’u mós sei kolabora tan ho kolega pintor sira ne’ebé iha grupu seluk atu bele hamutuk kontribui ideia ba iha atividade refere.” Informa Prezidente Asosiasaun Arte Moris Iliwatu Danabere
Nia hatutan, uluk luta nain sira luta ba ukun-an no agora hanesan jerasaun mai hamutuk atu hapara violensia iha nasaun ida ne’e no bele kontribui paz iha Timor laran tomak nomos ba iha nasaun seluk, tan ne’e arte moris sente kontente ba iha espasu ida ne’e. Ba iha ekipamentu pintura nian ne’e arte moris hetan apoiu husi vinodpatel.
Esplika kle’an liután katak atividade ne’e partisipa husi estrutura Universidade, Fakuldade, Funsionariu, nomos estudante Unpaz. Iha atividade pintura ne’e sei hala’o husi arte moris hodi pinta ba moru lolon area Univerisdade da Paz nian no servisu hamutuk ho HWPL nomos hetan apoiu ekipamentu ba pintura nian husi vinodpatel.
Reportajen : Domingas
Foto : Domingas