Dili, 04 Fevereiru 2026 (Média Democracia) – Governu Estadus Unidus Amerika liuhusi Embaixada Estadus Unidus Amerika mai Timor-Leste sei oferese treinamentu kontra terorismu ne’ebé sei fó husi US Marine Corps.
Formasaun ne’e hanesan parte ida atu hasa’e Interopabilolidade entre PNTL-UEP ho US Marine Corps personel hodi fasilita koñesimentu tékniku prátiku ne’ebé di’ak no fortalese kooperasaun bilaterál iha área seguransa ba apoiu estabilodade nasional no rejionál.
“Ita hetan oportunidade husi parseiru Embaixada Estadus Unidus Amerika (EUA) hodi konvida Eis Mariñas Korpu nian atu fó formasaun iha Embaixada, entaun aproveita oportunidade sira mós mai halo formasaun liu-liu ba Unidade Espesial Polisia, husi unidade espesial Polisia, ita foti sira ne’ebé foka liubá komandu operasoes espesial.” Dehan Komisáriu Jerál PNTL Henrique da Costa iha Komandu UEP Bairo-Pite Tersa ne’e (03/02)
Komisáriu Jerál PNTL hatutan, formasaun ida ne’e sei hala’o durante loron tolu, liuliu atu aprende kona-ba kontra terorizmu nian husi maluk sira ne’ebé iha espesialidade ba área ne’e. Entaun sira fó oportunidade ba ita-nia polísia hodi bele tuir treinu. Treinu ida ne’e bele fó mós ita-nia oportunidade ba unidade espesiál sira kooperasaun espesiál sira nian hodi responde ba terorismu. hanesan mós ita hatene katak agora daudaun ameasa terorista ne’e la’ós dehan iha nasaun ida ka rua de’it maibé ita bele hateten katak iha nasaun barak terorista ne’e sai hanesan ameasa ida. Aleinde ne’e ita-nia formandu ne’ebé partisipa iha formasaun hamutuk 35 pesoas.
Komisáriu Jerál PNTL esplika mós kona-ba formasaun ne’e iha Komando Operasoens Espesiál nia membru balun hetan ona formasaun iha rai laran inklui balu iha rai liur, hanesan iha Australia, Portugal no balun mós ba iha Indonesia, nomos agora sira hetan oportunidade husi kolega sira Estadus Unidus da Amerika. Aleinde ne’e Formasaun refere la’ós foin primeira ves maibé hahú kedas husi tinan 2018 ne’ebé fó ba Unidade Espesiál ho nivel tres no sira seluk mós.
Iha fatin hanesan, Chason Peabody nu’udar Regional Security Officer hateten, onra boot ida atu hamrik iha ne’e hodi asiste parseria inkrivel ida ne’e nu’udar ofisiál aplikasaun lei federal nian.
“Nu’udar veteranu ida husi Mariña Estadus Unidus nian, ha’u sente hanesan iha uma entre ofisiál polísia sira, soldadu sira, Mariñeiru sira no Mariña sira, Kursu ida-ne’e, reprezenta liuhusi instrusaun téknika iha Marte. Kompromisu ba profisionalizmu, ba seguransa no komunidade no ba hametin seguransa no soberania ekipa Orle nian.” Dehan Chason Peabody nu’udar Regional Security Officer
Iha loron tolu tuir mak sei fó treinamentu ho péritu sira ne’ebé sei hetan orientasaun husi instrutór korpu mariña EUA nian. Sei aprende abilidade sira ne’ebé presiza atu hala’o operasaun sira kontra-terorizmu nian ho seguru, abilidade sira la’ós de’it tátiku sira, estratéjiku iha operasaun hotu-hotu, ita-boot hala’o kontribuisaun sira ba estadu direitu, tuir ne’e atividade ilegál no promove estabilidade Rejionál.
Nu’udar parseiru, Estadus Unidus orgullu atu hamriik hamutuk ho Ekipa ida ne’e hodi harii konfiansa ida ne’ebé iha kapasidade iha forsa polísia auto-sufisiente, ne’ebé junta abilidade espesializadu sira no mantein komunidade sira seguru.
Kontra-terorizmu maka serbisu ida ne’ebé difisil liu no ho risku aas liu iha aplikasaun lei, no iha militár. Ida-ne’e presiza dixiplina, abilidade julgamentu no konfiansa, liuliu entre ita-boot nia ekipa, ida-ne’e mós presiza aten-barani morál atu halo buat ne’ebé loos iha presaun nia okos.
“Ba ami-nia instrutór Mariña Korpu, obrigado tanba atu fahe ita-boot nia esperiénsia, tempu no kompromisu ba exelénsia no ba partisipante sira ne’ebé prepara-an durante loron tolu. Ha’u hein atu haree oinsá ita-boot sira-nia abilidade kontribui ba ekipa ida ne’ebé seguru liu, forte liu ka menus liu no oinsá ita-nia profisionál.” Dehan Chason Peabody nu’udar Regional Security Officer
Enkuantu formasaun ne’e sei hala’o durante loron tolu no iha membru Unidade Espesiál Polísia na’in 35 mak partisipa iha formasaun refere.
Reportajen : Estefania
Foto : Pájina Official PNTL