Dili, 05 Novembru 2024 (Média Democracia) – Rede Feto Timor-Leste Lansa Manual Fasilitasaun Jéneru no Ekonómika Família ba Pre-Kazamentu’ iha Ámbitu Inagura Loja Hakbiit Feto iha Edifísiu Rede Feto Timor-Leste. Atividades ne’e realizaTersa-feira Semana ne’e.
Prezidente Konsellu Diretoria Rede Feto Timor-Leste Zelia Fernandes hateten Durante tinan barak nia laran Rede Feto halo advokasia ba prevensaun Violénsia Bazeia ba liuhusi meiu oioin.
“Ita-boot sira akompaña iha públiku tinan barak nia laran ita halo advokasia ida forte tebes-tebes ba iha prevensaun Violénsia Bazeia ba Jéneru no Violénsia Doméstika, enkuadramentu legal oioin iha ona.” Dehan Prezidente Konsellu Diretoria Rede Feto Timor-Leste ba Jornalista sira iha Edifísiu Rede Feto Caicoli Dili
Esforsu halo lei kontra Violénsia Doméstika nomos kria Spotlite Iniciative nune’e ema hotu kontribui ba iha prevensaun Violénsia Bazeia ba Jéneru, liuhusi halo Sosializasaun, Konferénsia no semináriu ne’ebé dalabarak realiza ona hodi kontribui ba Prevensaun Violénsia oioin hasoru feto.
Nia afirma kazu Violénsia doméstika kontinua eziste, ho nune’e Rede Feto koopera ho Igreja liuhusi programa Pre-Kazamentu.
“Importante mós atu oinsá bele integra ho parte Igreja ninian ba programa ida Pre-Kazamentu, tanba iha Igreja ita haree katak antes família foun ida atu ba kazamentu sira liuhusi prosesu formasaun antes ba kazamentu, entaun ida ne’e interasante, oinsá Manual Pre-Kazamentu ida ne’e kombina entre valores relijiaun no valores família nian, oinsá hametin família kulturálmente.” Nia afirma
Ho nune’e liuhusi kombina valores rua ne’e mak bele reforsa inisiativa prevensaun ba Violénsia Bazeia ba Jéneru.
Nia dehan matéria ne’e Rede Feto halo Konsultasaun ho Dioseze Maliana inklui Parókia balun ne’ebé hetan resposta pozitivu.
“Depois ita iha materia ne’e ita halo Konsultasaun ho parókia Aimutin no Parókia seluk nomos dioseze Maliana rasik, bainhira ita halo Konsultasaun ita hetan feedback ida di’ak, kuaze konsellu pastorál sira apresia ho inisiativa ida ne’e. Sira hanoin katak inisiativa ida ne’e di’ak bele kombina ho formasaun ne’ebé halo iha parte Igreja ninian.” Nia dehan
Nune’e liuhusi resposta pozitivu ne’e, Igreja husu atu aumenta tan asuntu rua kona-ba Saúde Reprodutiva nomos Violénsia Bazeia ba Jéneru nune’e hodi reforsa tan ba iha Manual refere.
Enkuantu liuhusi ideia sira ne’e Rede Feto Timor-Leste hahú halo ona introdusaun ba Manual refere iha Parókia balun, ne’ebé iha apresiasaun di’ak ba inisiativa ne’e rasik no tempu badak sei habelar tan Manual ne’e.
Prezidente Diretória ne’e mós akresenta katak Manual refere bele utiliza ba formasaun iha futuru.
“Manual ida ne’e la’ós hela de’it iha ne’e maibé Manual ida ne’e bele utiliza iha formasaun sira ne’ebé sei mai, tanba ita haree katak kazu VBJ no Violénsia domestika ne’e la’ós tur-tur baku malu de’it, maibé mai husi komunikasaun ne’ebé la harmonia ona iha família desrespeitu iha família nia laran mesmu halo juramentu iha Igreja no fim sei iha mós baku-malu no tuku-malu.” Nia akresenta
Entretantu Manual Pre-Kazamentu ne’e atu reforsa oinsá bele hametin fé familia nia fiar ba malu, respeita malu no koñese mós kona-ba orgaun reprodutiva sira ne’ebé presiza protesaun no prevensaun ba iha área ne’ebé sensitivu liu hodi prevene ba iha Violénsia Bazeia ba Jéneru.
Nune’e Rede Feto Timor-Leste sei kontinua halo komunikasaun ho Parte Igreja nune’e bele introdúz iha formasaun Igreja nian liuliu ba sarani sira ne’ebé atu forma família.
Reportajen : Estefania
Foto : Estefania