Viqueque 01 Novembru 2024 (Média Democracia) – vida agrikultura la fasil ba ema hotu atu hala’o, tanba liuhusi terus lubuk ida hisik kosar hanesan, fera rai iha loron manas laran no tenki rega modo loron-loron hafoin bele hetan nia rezultadu ne’ebé di’ak
Veronia Sampaio de Jesus ho idade 29 husi Munisípiu Viqueque Postu-Administrativu Lacluta Suku Dilor no Aldeia Rade-Uman, hanesan feto ne’ebé kreativu no hanoin di’ak nune’e nia deside ajuda nia kaben hodi buka osan liuhusi halo kantreiru iha uma hun, nune’e bele reforsa ekonomia familia
“Ha’u nia atividadeb loron-loron halo kantreiru iha uma hun ho nia medida 6 x 10m no fahe ba kabubu sanulu, kada kabubu rua ha’u kuda modo-mutin, alfase, tomate, repollu, no kabubu seluk rua ha’u kuda kanko rai maran,kabubu ne’ebé ha’u halo uza rai metan nomos niki teen. Kada loron ha’u rega dala rua dader- lorokraik durante fulan rua nia laran hafoin bele koilleta.” Dehan Veronia Sampaio de Jesus
Nia hatutan liután modo sira ne’ebé nia koilleta iha kantreiru balun lori ba fa’an iha merkadu no balun komunidade sira mai sosa iha uma de’it, modo ne’ebé nia fa’an ho folin barutu no fresku nune’e komunidade gosta mai hola loron-loron.
“Ha’u sente kontente tebes bainhira ema sira mai hola ha’u nia modo barak no hotu lalais , kada modo futun ida iha hun lima ha’u fa’an ho montante $0,50 ba modo mutin, repollu fuan ida ha’u fa’an $1.00, alfase hun lima $0,50 no tomate kada plastik ida fuan sanulu iha laran inklui kanko rai maran futun ida fa’an ba $0,50 nune’e fasil ba ema bele hola lalais, modo ne’ebé kada loron ida ha’u fa’an sempre hetan $10. Dolar.” Dehan nia
Veronia esplika liután, rendimentu ne’ebé durante nia hetan husi fa’an modo ne’e hodi ajuda ba nesesidade familia nian no balun prepara ba oan nia futuru, atividade nia halo la sente kolen no baruk atu luta ba nesisidade uma laran, maske ho esforsu todan ida ne’e la sai hanesan obstaklu ba moris maibe nafatin iha esperansa boot, hodi hisik kosar atu bele hetan netik bukae ba loron aban-bainrua nian.
Reportajen : Nelfiano
Foto : Nelfiano