Dili, 29 Setembru 2025 (Média Democracia) – Prezidente Republika José Ramos Horta konsidera prova hametin amizade entre nasaun Timor-Leste no Malazia liuhusi vizita ofisial Primeiru Ministru Malazia Dato’ Seri Anwar Ibrahim iha Timor-Leste.
Iha komunikadu Prezidente Republika José Ramos Horta hateten, ho ksolok boot, hanesan PR Timor-Leste fó benvindu ba belun di’ak, Onoravel Dato’ Seri Anwar Ibrahim, Primeiru-Ministru Malázia nian, iha ninia vizita ofisiál mai Timor-Leste.
“Primeiru Ministru Malazia nia vizita ida ne’e nu’udar prova ida ba amizade ne’ebé kle’an no metin entre ita-nia nasaun rua, amizade ida ne’ebé harii iha solidaridade no hametin liuhusi ita-nia kompromisu komún ba demokrasia, justisa, no pás. Malázia hamutuk ho ami durante momentu krítiku sira iha ami-nia istória, nune’e ami nunka atu haluha.” Dehan Prezidente Republika José Ramos Horta
Prezidente Horta informa, iha diskusaun ohin la’o ho di’ak, konstrutivu, no foka ba futuru. Hanesan nasaun Timor-Leste tenke prepara-an ba adezaun istórika ba ASEAN iha Outubru fulan oin mai iha Kuala Lumpur.
“Ami komprometidu atu servisu besik liután ho Malázia no membru ASEAN sira hotu atu kumpre kritériu sira ne’ebé sei falta iha ami-nia dalan atu sai membru plenu. Ami mós konkorda atu hametin liután ita-nia kooperasaun bilaterál ba ita-nia povu rua nia benefísiu. Ami sei enkoraja investimentu boot liután husi Malázia iha ami-nia setór xave sira hanesan agronegósiu, turizmu, no enerjia renovável. Ami sei habarak liután oportunidade ba ami-nia foin-sa’e sira liuhusi edukasaun no formasaun vokasionál iha Malázia. No ami sei serbisu atu hadi’a konektividade entre ita-nia nasaun rua, hodi fasilita viajen no komérsiu.” Informa Prezidente Republika José Ramos Horta
Nia hatutan, hein katak, aban ema hotu sei rona Primeiru-Ministru nia hanoin matenek bainhira nia hato’o ninia palestra ba nasaun Séri Palestra Prezidensiál 2025 ba dala-IV ho tema “ASEAN no Papel Timor-Leste nian.
“Sei sai onra boot ida ba ha’u atu kondekora Primeiru-Ministru Dato’ Seri Anwar Ibrahim ho Grande Colar da Ordem de Timor-Leste, ami-nia nasaun nia onra aas liu. Kondekorasaun ida-ne’e nu’udar rekoñesimentu ba ninia advokasia pesoál no kleur ona ba ami-nia kauza, no ba Malázia nia papel xave, iha ninia lideransa nia okos, hodi apoia ami-nia dezenvolvimentu nasionál no ami-nia jornada atu sai membru ASEAN ba dala-11.” Hatutan Prezidente Republika José Ramos Horta
Prezidente Republika Horta konklui, Timor-Leste no Malázia la’ós de’it nasaun viziñu, maibé Timor-Leste ho Malazia mak parseiru ida iha konstrusaun Sudeste Aziátiku ida ne’ebé dame, prósperu, no integradu. fiar metin katak vizita ida-ne’e sei loke kapítulu foun ida ne’ebé importante tebes iha relasaun entre nasaun rua ne’e.
Reportajen : Domingas
Foto : Media Officer PR