Dili, 08 Abril 2024 (Média Democracia) – World Vision Timor-Leste Realiza Worshop kolaborativu kompetisaun negósiu ne’ebé implementa iha Munisípiu Covalima no Raeoa, ba programa Power kona-ba Empoderamentu no kapasita feto ho foin sa’e sira.
Jestór Operasionál World Vision Iha Timor-Leste Humbelino Perreira hateten, Workshop ne’e nia objetivu atu halibur hamutuk lideransa Lokál ho fahe ideia no informasaun ba sira, nune’e hatutan fila fali ba komunidade sira hodi partisipa iha kompetisaun negosiu kiik ne’ebé projetu refere estabelese iha munisípiu Covalima no Raeoa.
“Tanba projetu ne ami hetan fundus husi Uniaun Europeia ne’ebé foka liu iha Munisipiu rua, tanba projetu nia objetivu ne’e mak oinsá atu ajuda ita-nia feto maluk sira hodi nune’e sira bele hadi’a sira-nia vida negosiu.” Dehan Jestór Operasionál ba Jornalista sira iha Novo Turizmu Tersa ne’e
Nia dehan tanba limitasaun iha fundu, entaun programa kompetisaun pekena micro ne’e sei fokus de’it ba iha Munisípiu rua maibé iha oportunidade tuir mai sei aplika mós ba Munisípiu seluk.
Humbelino haktuir projetu refere sira implementa tinan ida liu ona, ne’ebé nia inísiu husi ne’e servisu hamutuk ho grupu feto sira, oinsá atu emopdera feto sira liuhusi kapasitasaun oioin.
“Entaun ida ne’e tempu ba sira ona atu sira mós bele hamosu sira-nia hanoin oinsá atu hahú negósiu rasik ka atu mellora sira-nia negósiu ne’ebé durante ne’e iha, entaun projetu ne’e sei remata iha tinan oin mai tan, projetu ne’e iha klaran ona, entaun ami hakarak hamosu kompetisaun ida ne’e para ita bele suporta sira hodi kapasitasaun atu sira bele halo negósiu ka mellora sira-nia negósiu di’ak liután.” Dehan nia
Grupu sira ne’ebé partisipa iha kompetisaun refere sei hetan fundu depois de kompetisaun. ho nune’e orsamentu ne’ebé sira hetan bele uza ba halo negósiua bazeia ba grupu nia planu negósiu.
“Montante orsamentu kompetisaun ita sei ko’alia maibé konforme sira-nia planu ne’e hakarak halo negósiu saída iha sira-nia Munisípiu no ita sei haree mós tipu negósiu ne’ebé sira.” Nia afirma
Projetu refere foku liubá empoderamentu feto no juventude sira entaun kriteria prinsipal mak tenke ho idade produtivu nomos mai husi Munisipiu Covalima no Raeoa rasik, iha mós kriteria balun ne’ebé sei iha, ita sei ko’alia tan iha sesaun tuir mai.
World Vision sei servisu hamutuk ho ONG sira no Instituisaun Finanseiru ne’ebé durante servisu antes ona, sira mós servisu hamutuk ho lideransa komunitáriu sira hodi tau-matan ba grupu sira atu nune’e bele monitoriza atividade negósiu, nune’e atividade refere kontinua nafatin to’o fó benefísiu ba sira-nia família no komunidade sira iha Munisípiu.
Iha biban ne’e Administradór Postu-Administrativu Pássabe, Paulino Marques orgullu partisipa iha workshop refere tanba envolve hotu autoridade lokál no lidér komunitáriu sira hodi fahe ideia no informasaun kona-ba apoiu ONG Internasionál sira ba komunidade.
“World Vision prezensa tinan barak ona iha ita-nia rain, maibé barak liu konsentra iha vila no sidade maibé seidauk abranje iha komunidade ka grupu ki’ik sira iha parte foho liliu iha área izoladu, tanba ne’e ba oin karik presiza mós atu estende nia ezisténsia iha área izoladu atu nune’e promove ita-nia negósiu husi ita-nia grupu kiik sira iha áreas izoladu sira.” Dehan APA Pássabe.
Tanba iha ideia balu husi komunidade sira katak la’ós ba World Vision de’it maibé mós ba ONG ka ajénsia internasionál ne’ebé fahe ona ekipamemtu ka fundu ba grupu negósiu ki’ik sira.
“Maibé balun até agora paradu tanba ne’e mak ba oin karik bainhira atu fó apoiu finanseiru ka ekipamemtu ba komunidade tenke presiza servisu hamutuk ho parte governu atu nune’e bainhira kompaña internasionál ka NGO internasionál ida nia tempu finaliza ona karik sei bele entrega responsabilidade kontrolu projetu ida ne’e ba ita-nia governu lokál atu labele mosu hanoin iha komunidade katak governu kari fundu iha komunidade nia leet.” Nia afirma
Tanba ne’e presiza ONG ka Ajénsia ne’ebé akompaña komunidade sira presiza preparasaun téknika no koñesimentu atu bele fó kapasidade ba komunidade sira liuliu ba grupu sira hodi bele kompete ho grupu seluk nomos Munisípiu sira seluk.
Reportajen : Estefania
Foto : Estefania
Editor : Jp.Costa