Dili, 21 Juñu 2025 (Média Democracia) – Xefe Suku Bebonuk fó apoiu no husu ba inan aman estudante husi eskola Rainha da Paz bebonuk atu hato’o keixa ba polisia servisu investigasaun criminal PSIC relasiona ho fundador eskola nomos nain ba rai ne’ebé taka eskola la iha desizaun klaru ho inan aman estudante sira iha Suku Bebonuk.
Iha entrevista ho Xefe Suku Bebonuk Alfredo da Costa hateten, eskola ida naran Rainha da Paz Bebonuk ne’e depois muda tan fali naran ba São Gabriel no ema sira ne’e durante mai iha sede Suku Bebonuk hodi halo reklamasaun ba Xefe Suku liuliu ba iha nain ba rai nomos fundador ne’e, nune’e buka hodi resolve sira nian problema tanba foin daudaun ne’e sira problema to’o baku malu iha ne’ebá. Sira problema laos tan buat seluk maibé problema tan osan, entaun nain ba rai ho fundador iha ideia ne’ebé kontra malu no taka tiha eskola no labarik sira la eskola durante fulan tolu nia laran ona,
“Hanesan Xefe Suku, ha’u dehan ba labarik estudante sira ha’u la halimar ho sira, husu ba ita-boot sira atu labele halo labarik sira ne’e sai vitima tanba laos ita-boot sira mak jerasaun kontinuador maibé labarik sira ne’e mak jerasaun ba rai ida ne’e, nune’e ha’u hanesan Xefe Suku iha bebonuk ha’u nafatin husu ba iha nain ba rai nomos ba iha fundador atu koopera ho diak hodi loke fali eskola ne’e, imi nia problema ne’e ketak maibé imi tenke hatene eskola ne’e estudante sira selu laos gratuita, se la kopera ha’u apoiu ba inan atu ba hato’o keixa no mai kaptura tiha sira tanba sira halo eskola ne’e paradu no estudante sira mak sai vitima ba sira nia hahalok.” Dehan Xefe Suku Bebonuk Alfredo da Costa ba jornalista sira iha nia kna’ar fatin kuarta semana ne’e
Nia dehan, sira nia interese ne’e halo estudante sira maka sai fali vitima tanba lakoi koopera ho di’ak ba malu, foin lalais sira mai halo ona reklamasaun iha sede Suku Bebonuk hodi kestiona ba sira nia kooperasaun ne’ebé la diak ba malu, maibé hatene autoridade atu dehan eskola Rainha Bebonuk ne’e fasilidade de’it la iha, eskola deit la hadia osan sira estudante selu ne’e ba iha ne’ebé, maibé ikus sira hakarak muda eskola.
“Hanesan Xefe Suku ha’u hakarak dehan tan dala ha’u la halimar ho imi no imi lakohi resolve lalais imi nia problema sira ne’e hodi loke fila fali eskola, ha’u sei haruka labarik estudante sira ne’e ba hatoo keixa iha diresaun PSIC nian atu bele mai kaptura tiha imi, ha’u la halimar ho imi, dala ida tan tanba imi nia hahalok halo barik sira ne’e maka sai vitima labele hanesan ne’e no ohin reprezentante inan aman nomos alin estudante sira mai ona iha ne’e ha’u apoiu sira atu ba hato’o keixa iha PSIC hodi mai buska sira fundador hotu inklui mós nain ba rai, nomos Xefe eskola nian, tanba eskola ne’e selu laos gratuita estudante balun selu to’o atus tolu liu ne’e laos gratuita ne’ebé labele halimar ho inan aman sira ne’ebé sofrementu ba buka osan hodi selu oan sira nian eskola, karik la loke eskola mak tenke revolsa “selu hotu fali estudante sira nia osan” dala ida tan ha’u fó hatene ba fundador sira ne’e atu bele resolve lalais imi nia problema no loke fali eskola refere.” Informa Xefe Suku Bebonuk
Nia Subliña liután, problema lolos ne’e sira mai halo reklamasaun iha sede Suku Bebonuk ne’e sira deskonfia malu katak la iha balansu ba iha osan entre nain ba rai nomos fundador, no sira deside ona atu resolve familia maibé sira nonok to’o agora sira halo problema baku malu raan lori malu mai to’o Xefe Suku depois sira atu taka eskola, nune’e hanesan Pozisaun Autoridade Lokal nian mak se sira lakoi resolve ne’e sira nia problema maibé tenke loke fila-fali eskola ne’e, husu mós ba Ministeriu Edukasaun atu foti asaun ruma haree ba iha problema ne’e, tanba seriu se la resolve sei fó vitima ba iha estudante sira nia futuru.
Reportajen : Domingas
Foto : Domingas