Dili, 31 Dezembru 2025 (Média Democracia) – Xefe Kaza Sivil Prezidénsia Repúblika, ohin simu ofisialmente doasaun sasán nesesidade bázika husi Embaixada Reál Tailándia nian, hodi marka époka Natál no Tinan Foun. Atividade ne’e Média Democracia asesu husi pajina PR kuarta semana ne’e.
Xefe Kaza Sivil Prezidente Repúblika, Jesuína Maria Ferreira Gomes hateten, atividade ne’e lidera husi Embaixadór Atipat Rojanapaibulya no nian kaben, kontribuisaun ne’e inklui fós kilograma 20 saku 10, mina-tein litru 4 hamutuk masa 10, no ekipamentu ijiene nian hanesan sabaun hariis kaixa 1, pastadente kaixa 1, Eskova nehan kaixa 1 no Detergente rahun kaixa 2. Jestu ne’e parte husi parseira naruk ida ne’ebé ho objetivu atu fó apoiu umanitáriu ba sidadaun sira ne’ebé vulnerável liu iha territóriu laran tomak.
“Ida-ne’e bele ajuda tebes ema sira ne’ebé presiza, hanesan orfanatu sira no komunidade sira ne’ebé presiza nesesidade bázika, liuhusi apoiu ne’e, ita bele tulun fali sira ne’ebé presiza tebes.” Dehan Xefe Kaza Sivíl Jesuína Maria Ferreira Gomes
Xefe Kaza Sivil afirma, elojia mós kompromisu kontínua husi Embaixada Reál Tailándia, hodi nota katak sira-nian apoiu ne’e la’ós de’it durante períodu festivu maibé mós inklui projetu umanitáriu oioin durante tinan tomak. Unidade servisu sosiál Prezidénsia nian sei garante distribuisaun ne’ebé lalais no transparante ba sasán sira-ne’e.
“Item sira ne’ebé apoiu ne’e sei distribui liu husi programa sosiál sira Prezidénsia Repúblika nian, ne’ebé sei jere husi Unidade Servisu Sosiedade Sivíl no Assuntu Sosiál (SSSAS), ho objetivu atu hatan ba pedidu urjente sira husi komunidade sira.” Afirma Xefe Kaza Sivíl
Esplika liután ho atividade kona-ba reforsa inisiativa sosial Prezidensial liuhusi doasaun Natal nian hodi diresiona inisiativa sira ne’e ba sidadun sira ne’ebé rekursu menus, Prezidénsia Repúblika buka atu garante katak espiritu Natál bele transforma ba apoiu konkretu no aliviu loos ba família sira ne’ebé hasoru susar.
Reportajen : Nelfiano
Foto : Media PR