Covalima, 26 Dezembru 2024 (Média Democracia) – Autoridade Komunitariu Suku Ogues Postu-Administrativu Suai Munisipiu Covalima husu governu atu labele haluha promesa ne’ebé governu promete hela ba komunidade suku Ogues kona-ba irigasaun bee moos no estrada
Iha entrevista ho Xefe suku Ogues Febriano Atok Pereira hateten, bee moos ho estrada sai hanesan parte ida ne’ebé importante tebes ba iha nesesidade loron-loron nia, koalia ba iha bee moos realidade ne’ebé komunidade Suku Ogues enfrenta duni ba iha problema bee mos iha tempu naruk nia laran komunidade sira asesu de’it bee matan husi mota nian hodi konsumu ba nesesidade loron-loron, aleinde ne’e komunidade sira asesu bee moos ho distansia ne’ebé dok tebes husi Komunidade nia uma kuase kilometru 2, husi uma to’o bee matan
“Asuntu seluk haree ba bee moos sai hanesan problema baziku ne’ebé komunidade suku Ogues rasik hasoru ida seluk fali mos haree ba Estrada sai mós preokupasaun boot ba komunidade suku Ogues atu transporta sira-nia produsaun ba iha merkadu tanba ne’e husu ba governu liu-liu MOP atu aselera prosesu tenderizasaun atu nune’e labele difikulta movimentasaun komunidade nian ho transporte.” Lia-hirak ne’e hato’o husi Xefe suku Ogues Febriano Atok Pereira liuhusi Via-WhatsApp
Nia hatutan Parte seluk hanesan autoridade komunitario nia ezizensia sempre Ezizi ba iha governu liu-liu ba iha nonu-governu atu responsabiliza promesa ne’ebé durante ne’e halo komprimisu ba povu liu-liu haree ba iha nesesidade povu nian hanesan bee moos no estrada, tanba durante ne’e problema ne’ebé komunidade Suku Ogues hasoru tinan naruk nian nia laran ona.
Hatutan husi Prezidente Autoridade Munisipal Covalima Miguel Armanda Cardoso hateten, koalia kona-ba estrada no bee moos iha ona servisu munisipal ida ne’ebé hanaran obras publika iha mos orsamentu ne’ebé naton atu bele responden ba iha estrada, tan ne’e hanesan Prezidente Autoridade Munisipal entrega ba iha obras publika haree ba iha kestaun refere.
“Estrada sai hanesan problema ka preokupasaun ba iha komunidade sira nomos ba ita hotu komunidade Covalima, estrada liga ba Postu no ba suku mak seidauk diak, ita iha planu ne’ebé identifika ona no tama ona iha sistema katak sei halo maibé tinan oin no estrada rural sira ne’e sei fó ba iha obras publika mak bele haree tanba ne’e sistema refere iha ona.” Dehan Prezidente Autoridade Munisipal Covalima Miguel Armanda Cardoso
Nia hatutan estrada Suku Ogues nian Tama ona ba iha sistema esperansa tinan oin bele halo ona nomos haree ba iha bee moos nian hein katak PNDS Munisipiu Covalima bele toma atensaun atu bele haree ba iha preokupasaun rua ne’e atu nunee bele hamenus komunidade sira nia preokupasaun.
Reportajen : Domingas
Foto : Domingas