Dili, 02 Janeiru 2025 (Média Democracia) – Alfredu Tilman Gonçalves ho idade 60 husi Munisipiu Ermera Postu Atsabe Suku Lasabe Aldeia Autobu no iha oan nain neen (6), agora dadauk hala’o atividades negosiu hanesan fa’an sigaru, pulsa no gazolina iha estrada ninin tasi-tolu
Iha entervista Alfredu Tilman Gonçalves hateten, atividades negosiu ne’e nia hala’o kelur ona kuaze tinan ne’en, desde 2019 to’o agora 2024 no sei kontinua nafatin, tanba moris iha Dili la fasil atu hetan osan
“Ha’u komesa fa’an sasan ne’e iha 2019, iha momentu ne’ebé ha’u uza osan primeiru halo negosiu ne’e ho montante $100 dolar, ha’u hola uluk sigaru no pulsa hodi fa’an, hafoin liu tinan hira ha’u komesa fa’an tan gazolina. Osan sira ne’ebé ha’u hetan husi negosiu ne’e ha’u utiliza ba nesesidade familia no ida importante liubá ha’u mak ha’u uza osan negosiu ne’e hodi bele selu oan sira nia eskola.” Dehan Alfredu Tilman Gonçalves
Nia hatutan tan katak, iha loron boot ne’e nia senti kontente tan ema bele hola nia sasan barak, la hanesan ho loron baibain, nune’e loron boot mós nia nafatin esforsu-an hodi ba tur iha estrada ninin hodi fa’an sigaru, pulsa no gazolina
“Bainhira loron boot ha’u senti kontente tanba iha loron boot ne’e ema mai hola ha’u sasan barak, iha loron boot ne’e kada loron ida ha’u bele hetan to $50.00 dolar la hanesan ho loron babain sira ne’ebé hetan $25.00 dolar. Lolos ne’e loron boot ne’e atu hamutuk ho familia hodi festeza loron natal maibé mai ha’u hakarak fa’an nafatin sasan tanba ida ne’e mak oportunidade di’ak hodi buka osan. Sigaru ne’e ha’u fa’an ho folin tuir nia merek hanesan sigaru L.A ha’u fa’an ho presu $2.00 dolar, sigaru marboro ho surya ha’u fa’an $2.50 dolar no gazolina akua boot ida $2.00 dolar.” Hatutan Alfredu Tilman Gonçalves
Atu esplika kle’an liután katak Alfredu hanesan aman ida ne’ebé di’ak tebes ba nia familia hodi esforsu nian-an buka osan husi meus oi-oin no kalan-kalan hader de’it hodi fa’an sasan iha gerobak dalan ninin tasi-tolu tan deit hakarak familia moris di’ak no oan sira bele hetan edukasaun ne’ebé di’ak iha futuru.
Reportajen : Nelfiano
Foto : Nelfiano