Liquiça 04 Janeiru 2025 (Média Democracia) – Olga dos Santos idade rua-nulu resin-tolu (23), remata nia Ensinu Sekundaria iha Eskola Filial Hu-Iso Lara-Iso, Bogoro, la kontinua iha universitariu tanba de’it ekonomia la sufisiente no deside buka moris iha dalan ninin iha tempu finadu no loron boot Anu Novu. Dadaun ne’e hela iha Aldeia Raukasa, Suku Raukasa, Postu-Administrativu Bazartete, Munisipiu Liquiça.
Olga dos Santos haktuir katak, maske la kontinua iha nivel universitariu maibé deside buka moris iha dalan ninin iha tempu loron boot, hodi bele sustenta netik familia.
“Ha’u remata nivel Ensinu Sekundaria iha Eskola Filial Hu-Iso Lara-Iso, Bogoro, iha tinan 2020, planu atu bele kontinua iha nivel universitariu maibé ekonomia familia la sufisiente, entaun ha’u deside buka moris hodi bele ajuda familia. Iha tempu loron boot hanesan finadu no tinan foun ha’u sempre halo negosiu ida ne’e tanba sasan iha tempu loron boot ne’e folin di’ak tebes. Osan ne’ebé ha’u hahu halo negosiu ne’e impresta mama nia osan depois fa’an tiha sasan hetan ona osan funan mak foin fó fila mama nia osan inan. Sasan hirak ne’ebé ha’u fa’an hanesan Katupa, ida ho presu 0,10, Sate ida ho presu 0,25, Pop mie presu 0,50 centavus no mina Gazolina iha presu $1 no $2. Iha loron boot ne’e sasan folin no bele hetan remdimentu di’ak tebes kompara iha loron bain-bain. Iha tempu loron boot rendimentu hetan to’o $50 no liu to’o $100. Maibé iha loron bain-bain hetan de’it mak $10 no $30. Osan hirak ne’e ha’u zere balun hola hahan bo balun uza ba presiza loron-loron nian.” Dehan Olga dos Santos iha Aipelu.
Nia haktuir liután katak, maske ho negosiu kiik ida ne’e bele responde ba familia nian, tanba uma laran maun-alin barak, husi negosiu ida ne’e oinsa bele responde netik ba uma laran.
“Ha’u kontenti tebes halo negosiu kiik ida atu bele responde netik ba familia nian, tanba ha’u iha maun-alin hamutuk nain-sia (9), feto hitu (7), no mane rua (2), no feto ida no mane ida mak sei eskola hela iha Ensinu Pre-Sekundariu no sira seluk balun remata ona nivel Sekundaria no balun harii ona uma ka’in. Ha’u oan ba da- toluk husi maun-alin nian sia (9) ne’e.” Dehan Nia
Nia saliente liután katak nu’udar feto ida la moe no la baruk atu halo negosiu kiik iha dalan ninin, oinsa atu bele ajuda familia tenki esforsu hodi bele buka netik osan ruma hodi bele ajuda papa ho mama. Planu ba oin hakarak halo negosiu boot hodi bele loke kios no planu mós atu kontinua nivel universitariu iha tinan 2025.
Reportajen : Tomas
Foto : Tomas