Dili, 05 Novembru 2026 (Média Democracia) – Unidade Espesiál Polísia (UEP) encerra ona operasaun Alerta Finadu, ne’ebé hala’o durante loron neen, husi 29 Outubru to’o 04 Novembru 2026, ho rezultadu la rejista insidente grave ruma ne’ebé bele ameasa seguransa no orden públika iha territóriu nasionál.
Komandante UEP, Komisáriu Asistente Polísia Agostinho Gomes, hateten parada encerramentu ne’e hala’o atu taka ofisialmente operasaun Alerta Finadu, ne’ebé hahú tuir orden husi Komandu-Jerál Polísia Nasionál Timor-Leste (PNTL).
Nia esplika durante períodu operasaun, UEP hala’o atividade operasionál iha Kuartél UEP, Kompañia Alfa iha Caicoli, Kompañia Bravo iha Baukau, Kompañia Delta iha Maliana, no postu UEP rua iha Suai no Oé-Cusse, hodi fó apoiu ba Komandu Munisípiu Polísia iha munisípiu lima.
Nia hatutan UEP mós fó apoiu ba atividade patrullamentu iha munisípiu lima, mak Díli, Baukau, Maliana, Suai no Oé-Cusse. Atividade operasionál no patrullamentu sira ne’e hala’o ho di’ak, la iha problema grave ruma ne’ebé bele afeta seguransa no orden públika.
Maski nune’e, Komandante UEP konfirma katak iha kazu ida akontese iha Memo, Postu Administrativu Maliana. Maibé, kazu ne’e la tama iha área responsabilidade direta UEP, tanba área refere atribui ba unidade PNTL seluk.
“Bazeia ba relatóriu ne’ebé Komandante Kompañia Delta aprezenta, área ne’e koloka ba unidade PNTL seluk. Maibé, bainhira problema akontese, sira halo intervensaun no husu apoiu husi Unidade Espesiál Polísia Kompañia Delta. UEP tun halo intervensaun no konsege finaliza no fó rezolusaun ba problema ne’e,” Komisáriu Asistente Polísia Agostinho Gomes afirma iha nia diskursu durante parada encerramentu UEP, iha Kuarta-Feira (04/11).
Iha oportunidade ne’e, Komandante UEP hato’o apresiasaun no agradesimentu ba komunidade, liuliu juventude, tanba sira-nia kooperasaun, disiplina no komprensaun durante períodu Alerta Finadu, ne’ebé kontribui atu mantein situasaun seguransa no orden públika hakmatek.
Nia dehan atitude pozitivu ne’ebé komunidade no juventude demonstra durante períodu finadu tenke kontinua aplika iha atividade sosiál seluk, hodi hametin dame, harmonia no moris hamutuk iha sosiedade.
“Situasaun hakmatek ne’ebé ita enfrenta durante períodu finadu ne’e mosu tanba atitude ne’ebé komunidade no juventude demonstra atu kria dame no harmonia. Ita presiza kontinua mantein situasaun hanesan ne’e, atu komunidade bele moris hakmatek no kontente,” nia afirma.
Ikusmai, Komandante UEP hato’o mós agradesimentu ba família matebian, komunidade, juventude no órgaun komunikasaun sosiál sira, ne’ebé fó kontribuisaun liuhusi kooperasaun no divulgasaun informasaun kona-ba atividade Alerta Finadu PNTL, hodi hametin estabilidade, seguransa no dame iha Timor-Leste.
Reportajen: Octaviana da Costa
Foto: Octaviana da Costa