Dili, 06 Janeiru 2025 (Média Democracia) – Adelina Siga Soares ho idade 20 hakotu nia estudu iha nivel sekundariu tanba laiha finanseiru atu kontinua ba universitariu entaun nia deside loron-loron fa’an ema seluk nia modo tahan nune’e bele hetan osan hodi prepara ba estudu iha nivel universitariu
Tuir Adelina Siga Soares hateten, durante ne’e nia atividade loron-loron mak uza nia motor rasik hodi tula ema nia modo tahan husi Marnir lori lao tuir baraka iha Dili laran nune’e ema bele hola hodi fa’an fila-fila ba ema seluk
“Modo tahan loron-loron ne’ebé ha’u antar ba barak ki’ik sira iha Dili laran hanesan fehuk dikin, kanku no bayan kada loron ha’u sempre antar 100 dolar maibé lao dala ida lori 20 dolar entaun loron ida ha’u antar dala lima, ha’u lori ba fa’an futun tolu $0,50 hafoin fila ba uma entaun modo nain fó 25 dolar kada loron.” Dehan Adelina Siga Soares
Nia hatutan modo tahan ne’ebé nia antar ba baraka ki’ik sira husi Marnir ba to’o tasi-tolu, fomentu, merkadu maleuana merkadu taibesi no bekora, maibé haree mós ba situsaun karik tempu udan entaun antar de’it ba iha fatin sira ne’ebé besik nune’e modo tahan bele folin hotu lalais
“Dalaruma ha’u senti triste tebes tanba hanesan feto la fasil atu halo servisu sira hanesan ne’e maibé tanba de’it nesesidade nia obriga tenke esforsu-aan tomak nune’e bele halo tuir forsa ne’ebé iha bele hetan osan ajuda mós inan aman hodi sustenta ba nesesidade nian no haree mós ba alin sira nia estudu tanba ita tur hein de’it buat ida sei la mosu rasik entau tenke esforsu no buka rasik.” Dehan nia
Nia salienta durante nia halo atividade fa’an modo tahan tuir baraka iha Dili laran dalaruma sempre infrenta failansu balun maibé nia nafatin iha espiritu hodi luta hasoru problema ne’ebé nia infrenta, nune’e liuhusi atividade ki’ik bele hetan netik osan ituan hodi sustena ba presiza loron-loron nian.
Esplika kle’an liután katak, Adelina husi Munisiupiu Dili daudaun ne’e hela iha aldeia Marnir suku Comoro Postu-Administrativu Dom-Alexu hanesan feto negosiante iha forsa no kbiit espiritu nian nafatin iha esforsu hodi halo atividade servisu nune’e bele hetan osan ituan hodi ajuda inan aman suporta alin sira eskola no balun hodi uza presiza loron-loron nian
Reportajen : Nelfiano
Foto : Nelfiano