Dili, 07 Janeiru 2025 (Média Democracia) – José Alves ho idade 58 husi Munisípiu Manatutu daudaun ne’e hela iha Aldeia ramelau suku Lisbutak durante ne’e nia hala’o atividade servisu hanesan hili kalen-aat tuir dalan ninin nune’e bele hetan osan hodi sustenta ba presiza no haree oan sira ba eskola
Tuir José Alves hateten, kalen-aat sai hanesan toos no natar ba nia moris loro-loron nian maske servisu iha loro manas no udan nia laran maibé ida ne’e la sai kestaun no problema boot ba nia moris loro-loron nian
“Ha’u nia servisu loron-loron mak lao tuir dalan ninin tama sai bairu hodi buka kalen-aat nune’e bele lori ba tetu. Maibé liuhusi servisu kmook ida ne’e iha balun mak dehan ha’u hanesan ema difisiensia Psikososial tanba loron-loron sempre lao ba mai hodi buka kalen-aat iha foer nia laran maibé ida ne’e sai hanesan referensia ida mai ha’u tanba ami nia moris bazeia de’it ba servisu ida ne’e.” Dehan José Alves
Nia hatutan durante hala’o atividade servisu hili lata-mamuk no kalen-aat iha ema balun hasai liafuan ne’ebé la di’ak maibé ida ne’e hanesan dalan ida atu motiva nafatin ba nia nune’e labele para ho servisu ne’ebé nia halo loron-loron
“Kalen-aat ne’ebé ha’u hili tuku lima dadersan ha’u komesa sai husi uma dudu gerobak mamuk lao tuir estrada ninin nune’e bele hetan kalen aat ne’ebé ema soe iha estrada ninin no sampa fatin. Ita tenke hader sedu hodi lao tuir fatin ema sempre soe kalen aat tanba ema barak buka moris liuhusi hili kalen aat hodi ba tetu, nune’e bele hetan osan hodi sustenta ba nesesidade loron-loron nian.” Dehan nia
Nia salienta kalen-aat ne’ebé nia hetan barak liu iha sampa fatin tanba ema sempre halibur hamutuk maibé so ema ne’ebé toman ona halo servisu sira hanesan ne’e tanba atu hili kalen-aat iha sampa fatin tenke fuan boot, iha ne’ebá ita sempre hetan foer oioin maibé nafatin esforsu-aan hodi luta hasoru ba problema hirak ne’e.
“Osan ne’ebé ha’u hetan liuhusi tetu kalen-aat kada loron ha’u sempre hetan osan $15 too 17 dolar. Tanba kalen aat ne’ebé ha’u hili sempre lori ba tetu iha Aimutin Xineza sira kada kilu ida $0,50 karik iha besi balun ne’ebé todan hanesan kilu 10 ba leten entaun ita bele hetan osan di’ak.” Nia haktuir
Esplika kle’an liután katak José nia moris bazeia de’it ba hili kalen no besi aat sai hanesan toos no natar ba nia familia bainhira hetan osan husi tetu kalen, osan sira ne’e sei ajuda ba ekonomia familia nian no suporta mós oan sira ba eskola tanba sai hanesan aman laos oportunidade maibé ida ne’e hanesan responsabilidade ba familia.
Reportajen : Nelfiano
Foto: Nelfiano