Dili, 15 Janeiru 2025 (Média Democracia) – Silvina de Deus ho idade 70 husi Munisípiu Ermera Postu-Administrativu Atsabe, daudaun ne’e hela iha Munisipiu Dili Postu-Administrativu Dom-Alexo Suku Comoro area Tasi-tolu, moris loron-loron kria atividade negósiu hanesan fa’an bua, malus, ahu no tabaku iha estrada ninin, nune’e hodi responde ba nesesidade familia nian.
Tuir Silvina de Deus hateten, durante tinan barak nia laran moris hanesan ema negosiante hodi halo atividade negosiu ki’ik iha estrada ninin, nune’e bele hetan osan ituan hodi sustenta ba nesesidade loron-loron
“Ha’u fa’an sasan desde tinan barak nia laran ona maibé agora idade mós avansadu tanba laiha forsa atu lao dook ba buka sasan iha Munisipiu hanesan tempu uluk sei iha forsa hola sasan lori mai fa’an fila-fali, tanba Dili husi tempu uluk to’o agora sai hanesan fatin ba ema hotu atu buka moris liuhusi dalan oioin. Sasan ne’ebé ha’u lori halo negósiu ki’ik ne’e hola tutan husi ema ne’ebé mai husi Munisípiu Likisa hanesan bua, malus, ahu no tabaku.” Dehan Silvina de Deus
Nia hatutan sasan ne’ebé durante lori halo natividade negósiu ki’ik ne’e sempre hola bainhira ema lori husi Munisípiu Likisa hanesan bua, malus, ahu no tabaku hafoin bele fa’an tutan fila-fali tanba tur de’it iha uma se mak bele tau matan no ajuda
“Sasan ne’ebé ha’u hola bainhira ema lori mai ho folin ne’ebé la hanesan bua batan ida 7.50 dolar entaun ha’u fa’an fila-fali kesak ida $0,75 sentavu ne’e ba bua mamar karik bua toos batan 4.50 dolar ha’u fa’an fali kesak ida $0,50 sentavu. Ahu ema fa’an ba plastik sanulu 1.00 dolar entaun ha’u fa’an fali plastik rua $0.25 sentavu. Tabaku hola husi ema plastik tolu $1.00 dolar ha’u fa’an fali plastik ida $1.00 dolar. Malus ema fa’an futun tolu $1.00 dolar ha’u fa’an fali futun ida $1.00 dolar. Sasan hirak ne’e mak ha’u lori halo atividade negosiu, kada loron ha’u ho rendimentu ne’ebé naton hanesan loron ida bele hetan 8.00 to’o 10.00 dolar ba leten maibé haree mós ba sorte hotu.” Dehan nia
Nia afirma durante halo atividade negósiu maske hetan osan ho rendimentu ne’ebé ki’ik maibé ida ne’e la sai problema atu hamete nia negósiu, naran katak kada loron tenke hetan netik osan oituan hodi sustenta ba presiza loron-loron nian
Esplika kle’an liután katak avo Silvina maske ho idade ne’ebé boot maibé nafatin esforsu-aan hodi halo negósiu tuir dalan ninin, tanba moris hanesan negósiante tenke esforsu-aan. Atividade negósiu ne’ebé nia halo la sente kolen no baruk atu prezudika nia atividade maibé nafatin iha esperansa hodi esforsu no luta ba presiza loron-loron nian.
Reportajen : Nelfiano
Foto : Nelfiano