Dili, 15 Janeiru 2025 (Média Democracia) – Alcina da Costa ho idade 56 husi Munisípiu Lautem Postu-Administrativu Luro, daudaun ne’e hela Munisipiu Dili Postu-Administrativu Dom Alexo suku Comoro Aldea Moris Foun, nia atividade loron-loron loke keos ki’ik hodi sustenta nesesidade familia nian no haree oan sira nia estudu
Tuir Alcina da Costa hateten, durante moris iha mundu ida ne’e hanesan ema negósiante halo atividade loron-loron hanesan loke keos ki’ik fa’an iha dalan ninin tanba hakarak atu sustenta nesesidade nia presiza no suporta oan sira ba iha nivel sekundariu no universidade
“Osan ne’ebé ha’u lori loke keos uza osan rasik ho montante 150 dolar desde 2011 to’o agora. Ha’u loke keos hakarak sustente nesidade familia nian tanba ha’u nia kaben husik hela ha’u ho oan na’in neen desde tinan sanulu resin ona, buat hotu depende de’it ba keos ki’ik ida ne’e bainhira oan sira halerik husu osan atu selu mikrolete ba eskola dalaruma ha’u sempre dada iis no halerik tanba osan laiha atu sustenta ba oan sira-nia presiza maibé buat hotu ha’u tenke esforsu nafatn tanba ha’u mak sai hanesan xefe familia ba oan na’in neen.” Dehan Alcina da Costa
Nia hatutan loke keos durante tinan sanulu resin ona tanba hakarak sustena ba presiza loron-loron nian no haree oan nain neen nia eskola bainhira oan presiza lalais tenke responde, nune’e oan sira bele sente inan nia domin nafatin ho oan sira maske iha tempu susar nia laran
“Keos ne’ebé ha’u fa’an kada loron sempre hetan 5.00 too 10.00 dolar ba leten maibé ida ne’e ha’u sente la sufisiente atu responde ba ami nia presiza loron-loron nian maibé buat hotu sempre akampaña husi aman maromak nia tulun, atividade hotu sempre lao ho di’ak. Maske durante ne’e sempre hasoru difikuldade oioin, maibé hanesan inan tenke responsabiliza tanba ita tur hein de’it iha uma se mak bele tau matan ba ita nia presiza.” Dehan nia
Nia salienta rendimentu ne’ebé nia hetan loron-loron ho montante ne’ebé ki’ik tanba iha ema barak mak loke keos ki’ik iha estrada ninin hodi buka moris sustenta ba presiza ida-idak nian ne’ebé buat hotu liuhusi esforsu no kbiit ema ida-idak nian foin bele hetan susesu.
Esplika kle’an liután katak Alicina hanesan feto faluk ne’ebé nia kaben husik hela durante tinan sanulu resin ona hamutuk ho oan nain neen, entaun nia deside halo atividade negosiu hanesan loke keos ki’ik, nune’e bele hetan osan ituan hodi responde ba presiza loron-loron nian. Maske durante ne’e sempre hasoru problema oioin maibé hanesan inan la preokupa ho buat sempre akontese maibé nafatin fiar ba aman maromak buat hotu sei lao ho di’ak.
Reportajen : Nelfiano
Foto : Nelfiano