Dili, 20 Janeiru 2025 (Média Democracia) – Autoridade Protesaun Sivil liuhusi CNOPC hahu 13 to’o 20 fulan Janeiro tinan ne’e, rejistu familia uma-ka’in hamutuk 5 hetan estragus husi dezastre, ne’ebé akontese iha munisipiu neen (6).
Iha komunikadu imprensa ne’ebé hato’o husi porta-voz Xefe Relasaun Externa no Komunikasaun APC Nelson de Jesus Orleans afirma, durante akontesimentu dezastre iha Munisipiu neen, APC registu uma latama kriteria no apoiu deit emerjensia uma ida. Numeru uma ne’ebé priense kriteria ka afetadu hamutuk 5, nune’e APC Munisipiu apoiu kedas emerjensia ba vitima sira ne’ebé hetan dezastre.
“Dadus akontesimentu dezastre hahu husi Loron 13 to’o 20 janeiru 2025 iha teritoriu Timor dezastre ne’ebé APC registu iha tipu tolu hanesan bee-sae, Ahi Han-Uma, Anin-boot, Rai-halai durante semana ida, APC foti dadus ema afetadu ba dezastre ne’e hamutuk 27, akontesimentu ne’e APC registu tuir Munisipiu hanesan, Munisipiu Aileu, Postu Aileu, suku Hohulu, Aldeia Mauria, iha loron 14 janeiru rai lakan fera alin-mane ida mate fatin ho naran Kompletu Joel de Araujo tinan 14, Munisipiu Baucau Ahi Han-Uma ida, Munisipiu Dili Ahi Han-Uma ida no Anin-sobu Uma ida, Munisipiu Ermera Anin-sobu Uma ida, Munisipiu manufahi Anin-sobu Uma ida, Munisipiu Viqueque mota lori Ema ida maibé to Agora seidauk hetan isin lolon no Ahi Han-Uma ida.” Dehan porta-voz Xefe Relasaun Externa no Komunikasaun APC Nelson de Jesus Orleans
Porta-voz hatutan ho akontesimentu ne’e APC halo kedas verifikasaun dadus ba iha akontesimentu hirak ne’e nomos fó apoiu emerjensia ba kedas vitima sira atu nunee sira bele sai husi fatin hirak ne’ebé risku.
“Durante semana ida nia laran iha Munisipiu 6 Autoridade Protesaun Sivil, rejistu xefi familia uma-ka’in hamutuk 5 hetan estragus husi dezastre naturais ne’ebé akontese ba ema afetadu 27.” Dehan Xefe Relasaun Externa APC iha Salaun Konferensia APC Kaikoli, 20/01.
APC husu ba komunidade sira atu hela dok husi fatin risku tanba agora daudaun ne’e udan monu rai no mota mós tun, ne’eduni husu komunidade sira atu labele haluha haree labarik kikoan sira labele haris mota no udan, Aleinde ne’e mós husu ba komunudade sira labele soe lixu iha valeta laran atu nune’e labele halo intupudu karik udan monu rai la akontese inundasaun.
Reportajen : Domingas
Foto : Media officer