Dili, 22 Janeiru 2025 (Média Democracia) – Sekretáriu Estadu Asuntu Toponímia no Organizasaun Urbana (SEATOU) hamutuk ho Ekipa teknika Ministériu Obras Públikas akompaña hodi hala’o diálogu ho komunidade sira ne’ebé afeita ba alargamentu estrada publiku iha aldeia Fatumeta, Suku Bairo-pite.
Tuir Sekretáriu Estadu Asuntu Toponomia Organizasaun Urbana (SEATOU) Germano Santa Brites hateten, surumutu ida ne’e mai ho ekipa konjuntu bo’ot ne’ebé lidera husi SEATOU, hanesan governu Sekretáriu Estadu iha kbi’it atu lidera ekipa konjunta para atu servisu iha territóriu tomak liu-liu iha kapitál Dili.
“Iha sorumutu halo tanba hotu-hotu akompaña ona servisu husi ekipa konjunta ba implementasaun programa dezenvolvimentu liuliu ba alargamentu estrada iha kapital Díli, hanesan iha tinan kotuk hahú ona iha planu, maibé la halo diálogu ho komunidade sira, tanba ne’e agora halo diálogu ho komunidade sira hodi koopera hamutuk ho governu.” Dehan SEATOU Germano Santa Brites iha Aldeia Fatu-Meta.
Nia afirma liután, husu Alargamentu estrada sei kona husi espasu públiku sira hotu, ba maluk sira nia uma, Baraka no keos kona iha alargamentu estrada nian, husu atu koopera ho governu no estadu.
“Kuandu imi nia rai okupa estadu públiku no problema kona-ba rai privadu ita-boot sira ko’alia ho Terras, ekipa konjunta la’o hela, problema kona-ba uma identifikasaun husi Obras Públiku, sira mai identifika uma ne’e metru hira, luan ne’e hira, as ne’e hira ne’e servisu Obras Publiku nian. Ita hanesan sidadaun di’ak tenke koopera para alargamentu estrada ne’e di’ak hotu ona, ita mak sei goja.” Nia Afirma
Nia salienta tan tuir dezeñu Alargamentu estrada hahu husi Bairo-pite Fatumeta to’o estrada boot ba DIT nian distansia liu 1 KM no nia luan 14 M. nune’e uma sira iha estrada ibun parte rai lolon no kraik sei kona Eviksaun.
“Ita haka’as-an para hodi hadi’ak sidade ne’e, nune’e bele iha dezenvolvimentu, maibé ita balu lakohi koopera, se ita lakohi koopera sé tan mak atu hadi’ak ita-nia situasaun ida ne’e. Ita-nia na’i ulun sira balu mai ko’alia, ita mós tenke ajuda fó apoiu para atu nune’e dezenvolvimemtu ne’e bele ba oin, labele mai ita hatan hasoru, husu liu tiha fali dadus ne’ebé Obras Públiku nia rumus foti ne’e rumus Obras foti ne’e estandar nasional tiha ona, estandar baku ne’e metin ona ita labele muda, se ita muda ne’e tenke ba iha Konsellu Ministru tenke halo fali lei, muda fali 10 sentimu ne’e mós ita la aumento no la hamenus, Konsellu Ministru aprova tiha lei ne’e sei lori ba iha parlamentu, ba mak debate tiha la aprova dezenvolvimenru iha kraik la la’o. Entaun ita hanesan sidadaun di’ak ita hotu tenke koopera.” Nia esplika.
Iha parte seluk tuir Xefe Suku Bairo-Pite, Joaninha Alves Soares afirma, hasai komunidade husi nia hela fatin, liu-liu planu Governu halo alargamentu estrada, prosesu hotu-hotu tenke trata komunidade ho dignu, liu-liu sobu sira barak laiha uma, tenke halo indeminizasaun ka selu ba sasan ne’ebé hasai, nune’e komunidade bele utiliza osan ka sasan ruma hodi harii fali uma foun.
“Governu hasai ema husi nia fatin, laos inimigu ida, katak Governu tenke uza lei obrigatoriu, haree katak kondisaun mós koopera ona ho Governu, liu-liu SEATOU ho MOP hodi halo nia servisu, ezije nafatin katak hasai komunidade husi nia fatin ne’e fasil, maibé tenke hafasil liután mós indeminizasaun ba komunidade sira ne’ebé konsidera sai vitima ba planu Governu ba dezenvolvimentu nasional.” Afirma Xefe Suku Bairo-Pite, Joaninha Alves Soares
Entretantu Sekretáriu Estadu Asuntu Toponímia no Organizasaun Urbana SEATOU husu Komunidade sira atu koopera ho Governu, no Governu fó tempu fulan ida atu hahú prepara-an hodi hamamuk fatin.
Reportajen : Tomas
Foto : Tomas