Díli, 23 Janeiru 2025 (Média Democracia) – Estudante husi Universidade Oriental de Timor Lorosa’e (UNITAL) hamutuk Atus Lima Tolu-Nulu Resin-Ualu (538) husi Fakuldade Siensia Saúde Departamentu Enfermajen kompostu husi feto (388) no mane 150 partisipa iha serimonia Capping Day, Serimonia ne’e realiza iha salaun Delta Nova, Díli
Iha entrevista ho Komisaun Organizador Capping Day Edelvino do Santos Babo hateten, Objetivu prinsipal husi atividade capping day ne’e importante tebes mai estudante sira ne’ebé agora daudaun hala’o hela estudu iha Fakuldade Siensia Saude no Departamentu Enfermajen tanba husi atividade ohin atu fó hanoin ba estudante sira mai halo juramentu atu sai ema profisional ne’ebé sei tun ba terenu hodi hala’o nia profisaun iha komunidade sira nian le’et.
“Capping day ne’e hanesan atividade ida ne’ebé prepara husi ami estudante semestre 6 atu tun ba terenu ka ba hamahan-an iha ospital referal sira atu bele implementa siensa ne’ebé durante ne’e ami aprende ona iha Universidade hahu husi semestre 1 ate semestre 6 no ohin realiza atividade ne’e atu koñese kle’an liután ami nia profisaun hanesan enfermeiru/enfermeira hodi kesi metin ami nia profisaun.” Informa komisaun organizador capping day Edelvino do Santos Babo
Nia hatutan atividade ne’e la’o ho di’ak tanba estudante husi Universidade Oriental de Timor Lorosa’e (UNITAL) servisu hamutuk ho estrutura Universidade nomos ho estrutura fakuldade to mai iha inan–aman husi estudante sira inklui mós estudante hirak ne’ebé ohin partisipa iha serimonia refere.
Iha sorin seluk estudante Departamento Enfermajen Fabiano R. da Costa hateten, hanesan estudante iha Universidade ne’e asiste serimonia capping day ba dala-sia ne’e sente orgullu tebes tanba hahu husi etapa ida ne’e mak sira hatene lolos sira nia kna’ar ho profisionalidade, tanba halo juramentu ba sira nia-an katak, sei servisu ho profisional ba iha komunidade.
“Ami sei ba hala’o estajiu iha ospital referal tuir fatin ne’ebé identifika ona mak Baucau, Oe-cusse, Maubisse, Maliana, kona-ba estajiu nian ami estudante nain hira ne’ebé ohin partisipa iha serimonia refere sei fahe tuir fatin no ami sei hala’o ami nia estajiu durante fulan rua nia laran iha ospital referal sira ne’ebé ohin identifika ona.” Tenik komisaun organizador capping day Edelvino do Santos Babo
Nia salienta esperansa hanesan estudante ba iha futuru liuhusi juramentu ohin sei rekonese ona katak hanesan enfermeiro/enfermeira profisional ona no husu mós ba iha komunidade sira atu labele tauk no labele lakon fiar ba sira, maske sira hanesan estajiadu/estajiada maibé fiar katak siensia ne’ebé sira hetan ona ida ne’e mak sei implementa nomos sei rai segredu husi pasiente sira ne’ebé halo tratamentu iha ospital referal.
Reitor Universidade Oriental de Timor lorosa’e Claudino Ninas Navais hateten, atividade ne’ebé ohin realiza ne’e hanesan etapa foun ida ba sira nia estudu tanba atividade ne’e importante tebes ba estudante sira durante ne’e aprende siensia iha Universidade no ikus sei ba pratika ka implementa iha komunidade sira, entaun ohin ne’e hanesan pasu ida ba sira atu hakat ba juramentu no sai ema enfermeiro/a profisional husi sira nia aprende.
“Atividade ne’e fase ida importante iha Ensino Superior liuliu iha Fakuldade Saude Departamentu Enfermajen nian husi imi nain hirak ne’ebé ohin mai hala’o ona juramentu atu sai ema profisional iha imi nia kna’ar rasik, imi tenke implementa siensa saida mak imi aprende iha universidade rasik no sai profisional iha imi nia servisu rasik.” Dehan Reitor Universidade Oriental de Timor lorosa’e Claudino Ninas Navais
Nia husik hela mensajen katak husu ba iha estudante sira atu aprende ne’e laos mai deit husi dosente sira iha referensia lubuk ida ne’ebé sei hetan husi livru no imi sei aprende hamutuk ho komunidade sira bainhira ba hala’o estajiu durante fulan rua iha ospital referal sira no espera sei sai ema profisonal iha komunidade sira.
Reportajen : Domingas
Foto : Domingas