Dili, 03 Fevereiru 2025 (Média Democracia) – Ministériu Komérsiu no Indústria (MCI-sigla portugues), halo vizita ba iha edifísiu Kámara Komérsiu Indústria Timor-Leste (CCI-TL-sigla Portugues), hodi deskuti kona-ba servisu no kolaborasaun entre Ministériu ho CCI-TL, atu haree ba seitór privadu iha rai laran hodi kontribui ba dezenvolvimentu nasionál.
Reprezentante Prezidente CCI-TL Hergui Luina Fernandes Alves hateten, parazer boot ba iha Kámara Komérsiu Indústria Timor-Leste tanba hanesan parseiru ba Governu hodi ko’alia kona-ba servisu kolaborasaun ba iha seitór privadu nia kontribuisaun iha Dezenvolvimentu nasionál.
“Iha asuntu barak tebes no pertinente ita presiza deskuti ba iha interese seitór privadu nomos dezenvolvimentu nasaun nian no hanoin ohin konkorda atu estabelese Dialogu permanente ruma para ita bele ko’alia kle’an liu, la’ós ko’alia de’it maibé hamutuk haree solusaun para ita bele hadia ita-nia ambiente negósiu iha Timor-Leste.” Dehan Vise-prezidente CCI-TL Hergui Luina Fernandes Alves Iha edifísiu CCI-TL Acait Sexta ne’e (31/01)
Nia dehan iha vizita ne’e ko’alia liu kona-ba planu ba realizasaun Dili Internasiinal Expo ne’ebé Ministériu Komérsiu no Indústria iha planu atu servisu hamutuk ho Kámara Komérsiu Indústria Timor-Leste ba preparasaun to’o implementasaun expo.
“Planu sira seluk ne’ebé Ministériu hanoin atu halo husi nivel nasional to’o Munisípiu para atu involve CCI husi Munisípiu ida-idak nomos asuntu sira ne’ebé durante ne’e sai hela barreira ba seitór privadu sira inklui impata hela atividade komersiál iha rai laran nomos ambiente negósiu sira ne’ebé hamutuk ita presiza hadia hodi kria ambiente ne’ebé di’ak hodi halo atividade negósiu iha Timor-Leste.” Nia dehan
Vise-Prezidente ne’e mós afirma katak tuir planu ne’ebé hato’o husi Ministériu katak iha fulan Juñu no Jullu bele realiza, maibé sei kria ekipa ida hodi haree preparasaun hodi prepara planu ho di’ak atu bele envolve seitór privadu sira husi nasionál nomos investór hirak ne’ebé atu partisipa.
Iha biban ne’e Ministru Komérsiu Indústria (MCI-sigla portugues), Filipus Nino Pereira hatutan katak vizita ida ne’e importante tebes tanba husi Ministériu Komérsiu Indústria ba iha CCI-TL hodi deskuti kona-ba servisu hodi haree ba dezenvolvimentu ekonomia.
“Ita presiza sinézia ba servisu ne’ebé importante para atu dezenvolve ita-nia ekonomia ne’e sai hanesan pilar importante para ita dehan katak nasaun ne’ebé apostu, justu ne’e bainhira ita-nia ekonomia ne’e la’o ho di’ak, tanba ita hatene katak seitór privadu asume papél ne’ebé importante, seitór privadu mak tenke sai jogadór ne’ebé pro-ativu.” Nia haktuir
Tanba seitór privadu iha parte ida ne’e sai hanesan Stricker tenke hatama golu barak atu nune’e ekonomia rai-laran bele la’o tuir espetativa ne’ebé hakarak, tanba ita rekoñese ba papél entre governu ho seitór privadu sai hanesan parseria ne’ebé estratéjiku no presiza atu reforsa, hametin no dezenvolve seitór privadu.
Nia afirma katak vizita ida ne’e atu fó ispíritu no motivasaun boot liután liuhusi kolaborasaun atividade balun ne’ebé bele implementa.
“Ami hanoin importante ba iha aspeitu promosaun ba ita-nia produtu, tanba ita rekoñese katak ita konsumu importadu barak liu iha ita-nia rai, ne’e hatudu katak balansu komersiál ne’e negativu no difisil ne’ebé ho dadus fó sai husi Institutu nasionál estatístika tanba ne’e ita presiza meius no mekanismu oinsá ita bele halo promosaun ne’ebé di’ak.” Nia afirma
Nune’e ita iha identifikasaun di’ak ida ba ita-nia produtus potensiál ho valór ekonómiku ne’ebé aas para ba iha merkadu esportasaun nian, tan ne’e ita ho espetativas ida katak ita bele la’o ho polítika ida katak subtitui ba produtus importasaun sira ne’e. Tan ne’e ho eventu Dili Internasional Tride Expo ne’e bele sai hanesan fatin ida atu halo promosaun investimentu, promosaun ba negósiu no promosaun ba produtu rai-laran, ne’ebé presiza kolaborasaun ho estratéjiku ne’ebé di’ak.
Reportajen : Estefania
Foto : Estefania