Dili, 04 Fevereiru (Média Democracia) – Maske laiha parseiro hanesan ema seluk maibé la hamate Ricardina nia forsa atu buka moris liuhusi kria negósiu ki’ik hanesan fa’an dosi nune’e bele hetan osan hodi haree oan na’in rua nia eskola no presiza loron-loron.
Ricardina Henrique Gusmão ho idade (28) Adeia Fatumea, Suku Beduku Postu-Administrativu Dom Aleixo no oan na’in (2), nia hanesan inan faluk ne’ebé hala’o nia atividades loron-loron hanesan halo dosi hodi fa’an tuir estrada ninin.
Ricardina Henrique Gusmão hateten, nia hili fa’an dosi ida dalan ninin atu nune’e bele haree nia oan nia eskola no oan sira nia presiza loron-loron nian bainhira tur de’it iha uma susar atu hetan osan.
“Durante ne’e Ha’u kria rasik negósiu ki’ik hanesan fa’an dosi iha dalan ninin, nune’e bele hetan osan ituan hodi haree ba ha’u nia oan na’in rua nia nesesidade loron-loron, maske hetan osan oituan maibé ha’u agradese tanba bele haree sira rua nia eskola no ha’u nia presiza.” Dehan Ricardina via whatsApp
Nia hatutan tan katak durante nia fa’an dosi, kada loron hetan rendimentu ne’ebé naton hanesan $5.00 too 6.00 dolar, bainhira dosi la folin hotu nia lori fila ba uma hodi fahe ba nia oan sira han nune’e labele estraga.
“Ha’u fa’an dosi loron ida ha’u halo $5.00 too 6.00 dolar nian, karik ha’u fa’an to’o loraik mak la hotu ha’u fó sempre fahe ba oan no alin sira mak han de’it, tanba iha fatin ne’e ema barak mak halo dosi fa’an tuir dalan ninin, entaun dosi folin ladun di’ak.” Dehan nia
Nia mós afirma katak durante osan sira ne’ebé nia hetan husi halo negosiu fa’an dosi nia hola sasan mós ba oan feto primeiru nia presiza no balun lori selu nia eskola, tanba ida segundu seidauk eskola entaun gastu barak liu ba iha feto primeiru nia presiza.
Esplika liután katak maske kaben husik hela durante tian tolu nia laran oan laiha ema ida atu tau matan ba nia no oan nain rua. Entaun nia deside kria negósiu hanesan fa’an dosi hodi hetan osan nune’e bele uza ba presiza loron-loron no oan sira nia presiza
Reportajen : Ella
Foto : Ella