Dili, 03 Outubru 2024 (Média Democracia) – Governu liuhusi Ministériu Saúde realiza Konferénsia sientífika Sirurjia dahuluk iha Timor-Leste ho tema “Invest To Improve Surgical Health Care Service That Is Safe And Acessible To All, in Timor-Leste.” Atividade ne’e realiza iha City 8 Dili
Diretora Klínika Ospitál Nasionál Guido Valadares (HNGV), Ana Magno sente haksolok tanba Timor-Leste halo Konferénsia dahuluk ba departamentu Sirurjia hodi troka ideia ba malu ho espesialista rai-laran no Rai li’ur.
“Ohin loron ida ne’e kontente tebes no agradesementu ba Maromak bele halo primeiru Konferénsia ba departamentu Sirurjia ne’ebé halibur speaker sira husi nasaun seluk nomos speaker husi ita-nia rai laran rasik atu aprezenta sira-nia atendimentu ne’ebé ke úniku ba ita-nia pasiente sira ne’ebé baisa iha Ospitál Nasionál Guido Valadares.” Hatete Diretora Klínika HNGV
Nia esperansa liuhusi Konferénsia ne’e bele fahe ideia ba malu hodi halo diskusaun ba tratamentu kazu ne’ebé pasiente sira hasoru.
“Espera husi Konferénsia ne’e no fahe ideia ba malu kona-ba kazu sira ne’ebé estraordinariu sira haree ho ita-nia limitasaun ne’ebé iha, sira bele fó tratamentu ba kazu sira, nune’e bele halo diskusaun no fahe ideia ba malu, iha mós ideia foun ne’ebé fó hanoin atu dezenvolve departamentu serujia ba oin.” Nia Espera
Iha fulan Setembru ne’e hatudu katak atendimentu ba pasiente sira iha Hospital Nasionál Guido Valadares ne’e la’ós ba ema ne’ebé espesiál sira de’it maibé trata pasiente hotu hanesan de’it nu’udar sidadaun Timor-Leste.
Iha fatin hanesan Vise Ministru Saúde ba Operasionalizasaun Ospitál Flavio Brandao Mendes Araújo hatutan ohin loron primeira-vez médiku espesialista realiza atividade sientífiku ne’e hodi kontribui ba dezenvolvimentu.
“Entaun ohin loron ida ne’e importante tebes ba sira, sira halo mós loron sientífiku primeiru iha ita-nia rai laran, selebrasaun ida ne’e atu nune’e forma sira-nia sosiedade ida atu nune’e mais organizadu no kontribui di’ak liután, la’ós Timor oan de’it maibé ho parseiru sira ne’ebé iha ligasaun, ida ne’e mak ohin ita hamutuk iha ne’e, monos Profesór balun antigamente ajuda ona ita ona.” Vise Ministru Flavio hatutan
Nia dehan tinan 20 médiku sirurjia Timor oan ba foti espesialista área oioin iha kontinente hotu nune’e Timor-Leste la menus iha rekursu.
“Ita depois de 20 anus, ita iha médiku sirurjia ne’ebé treina iha nasaun oioin, iha kultura edukasaun oioin, kontinente oioin husi Amérika latina, Europa, China, iha Ásia mós iha, ita-nia médiku sira ne’e médiku espesialista sira iha disiplina oioin, iha otopedia, pediatria, iha plástiku, Sirurjia jerál, atu hateten katak ita la ki’ak no la menus iha rekursu iha área servisu refere.” dehan Vise Ministru
Nia haktuir katak presiza kondisaun ne’ebé di’ak ba forsa traballu nomos fó fiar ba médiku sirurjia rai laran.
“Ita presiza de’it mak oinsá forsa traballu sira ne’e bele hetan kondisaun di’ak atu bele forma di’ak liután ho nia outcome maka ita hetan fiar ba ita-nia Sirurjia médiku sira iha rai laran.” Nia haktuir
Iha entrevista ne’e Vise Ministru ba Operasionalizasaun Ospitál Flavio Brandao Araújo fiar katak sorumutuk ba loron rua ne’e bele halo diskusaun kle’an di’ak liután ba isu sira ne’ebé ligadu ho espesialidade sira ne’e.
Reportajen : Estefánia
Foto : Estefánia