Oe-Cusse, 05 Fevereiru 2025 (Média Democracia) – Modesta Maria Salo ho idade (24) daudaun ne’e hela iha bairo Samoro husi Aldeia Xanana suku Costa sub-Rejiaun Pante Makasar Rejiaun Administrativa Espesiál Oe-cusse Ambeno RAEOA, durante ne’e moris hanesan negósiante loron-loron tenke lao ain tuir dalan ninin hodi fa’an modo-kanku.
Tuir Modesta Maria Salo hateten, durante tinan barak nia laran moris hanesan ema negosiante hodi halo atividade negosiu ki’ik hanesan fa’an kanku, nune’e bele hetan osan ituan hodi sustenta ba nesesidade loron-loron nian no ajuda oan sira hola kadernu no lapis hodi ba eskola.
“Modo kanku ne’ebé lori halo negósiu durante ne’e ha’u rasik ke’e kolan ki’ik ida desde tinan 2022 nia laran iha uma hun ho medida ne’ebé naton. Tanba momentu ke’e kolan ha’u hanoin kuda kanku atu lori han de’it, maibé realidade ha’u haree kanku komesa buras no barak ona. Entaun ha’u tenke lori ba fa’an balun, nune’e hetan netik osan hodi hola fali sasan seluk no haree oan nia presiza.” Dehan Modesta Maria Salo
Nia hatutan tan katak modo kanku ne’ebé kada loron ema hola too $5 to’o $6 dolar maibé haree mós sorte ema ida-idak nian, tanba iha ema barak mak fa’an modo-kanku inklui modo seluk iha dalan ninin hodi buka osan hodi sustenta ba presiza nian.
“Maske ema barak mak lori modo tahan mai fa’an iha estrada ninin maibé ha’u nafatin esforsu aan hodi kompete ho ema seluk maske ha’u la’o tutur basia ne’ebé todan iha oras rua ka tolu nia laran tanba de’it nesesidade. Maske ha’u hetan rendimentu ne’ebé ki’ik hanesan $5 too $6 dolar kada loron. Tanba modo ne’ebé ha’u fa’an futun ki’ik $10 sent no futun boot $0.25, maibé ha’u fiar katak liuhusi osan ida ne’e bele sustenta ona uma laran bainhira ita tur de’it iha sé mak atu fó osan no ajuda ita-nia presiza loron-loron.” Dehan nia
Nia salienta liután maske loron-loron halo negósiu hetan osan ho rendimentu ne’ebé ki’ik maibé ida ne’e la sai problema, naran katak hetan netik osan oituan hodi sustenta ba presiza loron-loron nian no haree oan sira nia eskola, tanba tur de’it iha uma sei la hetan osan.
Esplika kle’an liután katak Modesta sai hanesan negosiante hodi buka osan liuhusi prosesu oioin maibé nia nafatin esforsu-aan kria negosiu ki’ik hanesan fa’an modo-kanku lao tuir estrada ninin ho kosar sulin iha oras rua ka tolu nia laran atu hetan osan ituan hodi responde ba nesesidade loron-loron nian. Maske kada loron hetan rendimentu ne’ebé ki’ik hanesan $6.00 dolar maibé bele fasilita ba nesesidade no apoiu oan sira ba eskola.
Reportajen : Nelfiano
Foto : Nelfiano